قصور۔07جون (اے پی پی):ڈپٹی کمشنرقصور محمد ارشد بھٹی نے بنیادی مرکز صحت گرین کوٹ اور بابا بلھے شاہ ڈسٹرکٹ ہسپتال کا اچانک دورہ کیا، ہسپتالوں میں ڈاکٹرز و پیرا میڈیکل سٹاف کی حاضری، صفائی ستھرائی ، طبی سہولیات ،میڈیسن کی دستیابی اور سٹاک کا بھی جائزہ لیا۔
ڈپٹی کمشنر نے بابا بلھے شاہ ڈسٹرکٹ ہسپتال میں ایمرجنسی، بچہ وارڈ، آؤٹ ڈور،ڈینگی وارڈسمیت دیگر حصوں میں سہولیات کو چیک کیااور ہسپتال میں زیر علاج مریضوں کی عیادت کی اور لواحقین سے دستیاب طبی سہولیات کے بارے دریافت کیا۔
ڈپٹی کمشنرقصورمحمدارشدبھٹی نے بتایا کہ وزیر اعلیٰ پنجاب کے وژن کے مطابق عوام الناس کو بہترین طبی سہولیات کی فراہمی اولین ترجیح ہے‘ صحت کی سہولیات کیلئے تمام ممکنہ وسائل کو بروئے کار لاتے ہوئے عملی اقدامات کیے جارہے ہیں۔ مریضوں کو علاج معالجہ کی بہترین سہولیات بہم پہنچانے کیلئے طبی عملہ ہمہ وقت دستیاب رہنا چاہیے،عوام الناس کو صحت سہولیات کی فراہمی میں کسی بھی قسم کی غفلت ہرگز برداشت نہیں کی جائے گی۔
