اسلام آباد، 7جون (اے پی پی):گورنرخیبرپختونخوافیصل کریم کنڈی نے پاکستان میں تعینات سعودی عرب کے سفیر نواف بن سعید المالکی سے اسلام آباد میں ملاقات کی۔
ملاقات میں کنگ سلمان ہیومنٹیرین ریلیف اینڈ ایڈ سنٹر پاکستان ونگ کے ڈائریکٹر عبداللہ البراک بھی موجود تھے۔ملاقات میں باہمی دلچسپی کے امور اور دو طرفہ تعاون کے فروغ پر تبادلہ خیال کیا گیا۔
ملاقات میں پاک سعودیہ تعلقات،صوبہ کے پی کے میں سرمایہ کاری کے دستیاب مواقع اورسرمایہ کاری کے فروغ پر بھی گفتگوہوئی۔
گورنر خیبرپختونخوا نے صوبہ کے پی کے سمیت ملک بھر میں شاہ سلمان ریلیف سنٹر کی امدادی خدمات کو سراہا۔
گورنر نے کہا کہ ملک بھر بالخصوص خیبرپختونخوا کے پسماندہ اضلاع میں غربت کے خاتمے اور دکھی انسانیت کی خدمت میں شاہ سلمان ریلیف سنٹر کی امدادی خدمات کو قدر کی نگاہ سے دیکھتے ہیں۔
گورنر خیبرپختونخوا نے کہا کہ حالیہ سیلاب میں شاہ سلمان ریلیف سنٹر کی جانب سے ڈیرہ اسماعیل خان، دیر، سوات، چترال اور چارسدہ کے علاوہ دیگر علاقوں میں سیلاب زدگان کی جس محبت کے جذبے سے امداد کی گئی ہے اسکی مثال نہیں ملتی۔
انہوں نے کہا کہ سعودی حکومت نے ہر قسم کے حالات میں ہمیشہ پاکستانی عوام کا ساتھ دیا ہے یہی وجہ ہے کہ پوری پاکستانی قوم کے دل سعودی حکومت و عوام کیساتھ ڈھرکتے ہیں۔
