اسلام آباد،12جولائی (اے پی پی):ایشین والی بال چیلنج کپ اور سینٹرل جونیئر والی بال چیمپئن شپ میں میڈلز جیتنے والی قومی سینئر اور جونیئر والی بال ٹیموں کو کیش انعامات سے نوازا گیا۔
اسلام آباد میں منعقدہ تقریب کے مہمان خصوصی وفاقی سیکرٹری بین الصوبائی رابطہ ندیم ارشاد کیانی تھےجبکہ تقریب میں پاکستان والی بال فیڈریشن کے چیئرمین چوہدری محمد یعقوب، پاکستان سپورٹس بورڈ کے ڈپٹی ڈائریکٹر جنرل شاہد السلام، سعید اختر سمیت دیگر شخصیات نے شرکت کی۔
تقریب سے خطاب کرتے ہوے وفاقی سیکرٹری ندیم ارشاد کیانی نے کہا کہ وزارت ملک میں کھیلوں کی ترقی کے لئے اقدامات کر رہی ہے، ہم جلد سپورٹس اکانومی پر کانفرنس منعقد کرینگے تاکہ سپانسرز دیگر کھیلوں کو سپورٹ کر سکیں۔ انہوں نے کہا کہ ہمارا ٹارگٹ اولمپکس 2028 ء ہے اور ہم چاہتے ہیں کہ بجٹ الاٹ ہو تو باصلاحیت کھلاڑیوں کے لئے ٹارگٹڈ پلان مرتب کریں اور تمام فوکس ان پر کیا جائے۔
وفاقی سیکرٹری نے کہا کہ ہماری کوشش ہے کہ منی سٹیڈیمز کو اکیڈمیز میں تبدیل کیا جائے تو کھیلوں کے کلچر کو پروان چڑھایا جائے جبکہ والی بال فیڈریشن کی وزارت ہر ممکن سپورٹ کرنے کے لیے ملک میں ہونے والی والی بال لیگ کے کامیاب انعقاد کے لیے اپنا مثبت کردار ادا کرینگے۔
تقریب سے خطاب کرتے ہوئے پاکستان والی بال فیڈریشن کے چیئرمین چوہدری محمد یعقوب نے کہا کہ والی بال ٹیم دنیا میں پاکستان کا نام روشن کر رہی ہے۔ فیڈریشن نے پورے سال کے لیے جونیئر اورسینئر پلیئرز سمیت کوچز کا پلان مرتب کیا ہے لیکن ہمارے پاس بجٹ محدود ہے۔ انہوں نے کہاکہ قومی ٹیم جتنے زیادہ انٹرنیشنل ایونٹس میں شرکت کرے گی اتنے بہتر رزلٹ پاکستان کو ملیں گے، امید ہے کہ وفاقی حکومت اس حوالے سے اپنا مثبت کردار ادا کرے گی۔
تقریب میں ایشین سینئر والی بال چیلنج کپ میں سلور اور سینٹرل ایشین جونیئر والی بال چیمپئن شپ میں گولڈ میڈل جیتنے اور ملک کا نام روشن کرنے پر کھلاڑیوں کو کیش انعامات سے نوازا گیا۔
