کوئٹہ، 25 جولائی (اے پی پی):بلوچستان کے سیلاب بحالی منصوبوں سے متعلق اجلاس میں میر سرفراز بگٹی کی بذریعہ ویڈیو لنک شرکت کی۔اجلاس وفاقی وزیر پلاننگ اینڈ ڈویلپمنٹ احسن اقبال کی زیر صدارت منعقد ہوا ۔
وزیر اعلیٰ بلوچستان نے اس موقع پر اظہار خیال کرتے ہوئے کہا کہ سیلاب متاثرہ علاقوں کی بحالی سرگرمیوں کے لئے گرانٹ پر وفاق کا شکریہ ادا کرتے ہیں، بلوچستان میں 2010 اور 2022 کے سیلابوں سے بڑی تباہی آئی تھی ۔انہوں نے اس امر پر زور دیا کہ کوئٹہ میں بحالی کے منصوبوں کے تحت موسمیاتی آفس کا قیام ضروری ہے، انہوں نے تجویز دی کہ پروجیکٹ پر پیش رفت کا جائزہ لینے کیلئے چیف سیکرٹری اور ایڈیشنل چیف سیکرٹری ترقیات بلوچستان کو کمیٹی میں شامل کیا جائے۔ انہوں نے کہا کہ کچھی کینال پروجیکٹ صوبے کا اہم زرعی منصوبہ ہے اور اس منصوبے کی پیش رفت کا جائزہ لینے کیلئے فوری اجلاس کا انعقاد ضروری ہے ۔
وزیر اعلیٰ نے کہا کہ وفاقی پی ایس ڈی پی میں شامل بلوچستان کے ترقیاتی منصوبوں پر جلد عمل درآمد اور انکی بروقت تکمیل سے صوبے میں ناصرف مواصلاتی رابطے مضبوط ہونگے بلکہ صوبے کی مجموعی تعمیر و ترقی اور انفراسٹرکچر پر بھی مثبت اثرات مرتب ہوں گے اور اس مقصد کے حصول کے لیے وفاق کا تعاون ناگزیر ہے۔
اجلاس میں چیف سیکرٹری بلوچستان شکیل قادر خان ایڈیشنل چیف سیکرٹری ترقیات حافظ عبدالباسط پرنسیپل سیکرٹری ٹو چیف منسٹر عمران زرکون سیکرٹری خزانہ بابر خان سمیت متعلقہ حکام کی ویڈیو لنک کے ذریعے شرکت کی۔
