دوشنبے، 02 جولائی (اے پی پی): گورنر خیبر پختون خواہ فیصل کریم کنڈی نے منگل کو یہاں معروف صنعتی گروپ ایوسٹو کے ہیڈ کوارٹر کا دورہ کیا، گروپ کے ڈائریکٹر سرمایہ کاری بیجن اذونو نے ان کے وفد کا استقبال کیا۔وفد میں معروف کاروباری شخصیت شہباز ظہیر ، رکن صوبائی اسمبلی ارباب ذرک خان اور دیگر کاروباری شخصیات شامل تھیں۔
اس موقع پر انہیں ایسوسٹو انڈسٹریز کے مختلف حصوں کا معائنہ کرایا گیا مذکورہ گروپ بیورجز، بینکنگ، میٹ ، بس مینوفیکچرنگ ، ہاؤس ہوکڈ اپلائنسز اور انٹرنیٹ کی فراہمی سمیت متعدد شعبہ جات میں کام کر رہا ہے۔ ادارہ کے ڈائریکٹر انویسٹمنٹ نے گورنر خیبر پختونخواہ اور ان کے وفد کو ادارہ کے بارے میں تفصیلی بریفنگ دی۔
گورنرخیبر پختونخواہ فیصل کریم کنڈی نے کہا کہ پاکستان اور تاجکستان مذہبی رواداری، دوستی اور اسلامی کلچر کے نہ ختم ہونے والے رشتوں میں بندھے ہوئے ہیں، 32 سال میں خیبرپختونخوا کے پہلے گورنر کے طور پر دوشنبے کا دورہ کرنا میرے لیے ایک اعزاز ہے اور میری یہ خواہش ہے کہ ہم اس دورے سے دونوں ممالک اور بالخصوص خیبرپختونخوا کے لیئے دور رس اثرات کے فوائد حاصل کریں ، دونوں ملکوں کے درمیان سرمایہ کاری کو فروغ دیں۔
گورنر فیصل کریم کنڈی نے کہا کہ دنیا میں ترقی کے لیئے معاشی خوشحالی بنیادی عنصر ہے، معاشی آسودگی کے بغیر قوموں اور ریاستوں کا ترقی کرنا ممکن نہیں ہے۔ انہوں نے کہا کہ پاکستان اور بالخصوص خیبر پختون خواہ کے سرمایہ کاروں کے لیے تاجکستان میں سرمایہ کاری کے بہترین مواقع موجود ہیں، اسی طرح تاجکستان کے تاجر پاکستان اور خیبر پختون آکر سرمایہ کاری کریں اس سے نہ صرف دونوں ممالک میں کاروبار کو فروغ حاصل ہوگا بلکہ عوام بھی خوشحال ہوں گے اور بے روزگاری کے خاتمے میں مدد ملے گی۔انہوں نے کہا کہ خیبر پختون خواہ میں نوجوانوں اور خواتین کی ترقی، انہیں معاشی طور پر مستحکم کرنا ان کی بنیادی ترجیحات میں شامل ہے۔
پاکستانی وفد کو آکیا ایوسٹو آٹوموبائل انڈسٹری کا بھی دورہ کرایا گیا جہاں بسوں کی تیاری کے تمام مراحل مکمل کیئے جاتے ہیں۔ گورنر خیبرپختونخوا نے ایسٹو گروپ کے وفد کو خیبرپختونخوا کے دورے کی بھی دعوت دی۔
