اسلام آباد،21جولائی (اے پی پی): وزیر اعظم کی کوآرڈینیٹر برائے موسمیاتی تبدیلی اور ماحولیاتی رابطہ رومینہ خورشید عالم کی زیر صدارت گلگت بلتستان میں کوہ پیما سکول کے قیام کے لیے وزیر اعظم کی کمیٹی کا دوسرا جائزہ اجلاس ہوا ۔اجلاس سے خطاب میں وزیر اعظم کی کوآرڈینیٹر برائے موسمیاتی تبدیلی اور ماحولیاتی رابطہ رومینہ خورشید عالم نے کہا ہے کہ وزیر اعظم کی ہدایت پر گلگت بلتستان میں کوہ پیمائی کے اسکول کے قیام کے لیے کوششیں شروع کی گئی ہیں جس میں تربیتی اور تعلیمی سہولیات خاص طور پر تیار کی گئی ہیں۔انہوں نے کہا کہ وزیر اعظم شہباز شریف نے کوہ پیما سکول کے قیام کے لیے بہت اہم کردار ادا کیا ہے۔ گلگت بلتستان اور ملک کے دیگر پہاڑی علاقوں میں ایسی سہولیات کا قیام جو خواہشمند کوہ پیمائوں کو پہاڑوں سے محفوظ طریقے سے لطف اندوز ہونے کے لیے علم اور اعتماد سے آراستہ کرنے میں مدد فراہم کرے گا اور ساتھی کوہ پیما کے مقامی ماحول، اقدار اور پہاڑی برادریوں کی ثقافتوں کا احترام کرتے ہوئے پائیدار اور ماحول دوست کوہ پیمائی کو فروغ دینے کے لیے ایک اہم تقلید ثابت ہوگا۔
انہوں نے کہا کہ اسکردو میں عالمی معیار کا پہلا سرکاری کوہ پیمائی اسکول قائم کرنے کے لیے گلگت بلتستان حکومت کے ساتھ قریبی تعاون اورایک منصوبہ پر عمل درآمد کیا جا رہا ہے۔ اس کا مقصد مقامی پہاڑی برادریوں کے لیے روزگار کے نئے مواقع فراہم کرتا اور پائیدار اور ماحول دوست کوہ پیمائی کو فروغ دینے میں مدد کرنا ہے۔
رومینہ خورشید نے کہا کہ خوبصورت گلگت بلتستان طویل عرصے سے دنیا کی دوسری بلند ترین پہاڑی کے ٹو سمیت اپنی خوبصورت بلند و بالا چوٹیوں کے لیے منایا جاتا ہے۔ یہ خطہ قدرتی خوبصورتی اور ثقافتی ورثے سے مالا مال ہے، جو دنیا بھر سے مہم جوئی اور متلاشیوں کو راغب کرتا ہے۔ اس خطہ میں کوہ پیمائی کو فروغ دینے کے لیے بہت بڑی صلاحیت موجود ہے ۔انہوں نے مزید کہا کہ اسکردو میں جلد ہی قائم کیے جانے والے مجوزہ کوہ پیمائی اسکول میں مقامی اور بین الاقوامی شرکا کو ضروری مہارتوں اور علم سے آراستہ کرکے، ہمارا مقصد کوہ پیماں اور سیاحت کے پیشہ ور افراد کی ایک نئی نسل کو فروغ دینا ہے جو گلگت بلتستان کی قدرتی اور ثقافتی سالمیت کے تحفظ کے لیے پرعزم ہیں۔
قبل ازیں اجلاس میں کوہ پیمائی کے نصاب، متعلقہ مہارت کی نشوونما کے لیے ماڈیولز، ریسکیو ٹریننگ، کوہ پیمائی اسکول کی تعمیر کے لیے جگہ کی نشاندہی، مقامی ٹور گائیڈز کے لیے تربیتی پروگرام اور مجوزہ کوہ پیمائی کے قیام اور انتظام کے لیے ممکنہ فنڈنگ کے مواقع اور تعاون کے مواقع پر تفصیلی تبادلہ خیال کیا گیا۔
اجلاس میں دیگر کے علاوہ ایڈیشنل سیکرٹری موسمیاتی تبدیلی اور ماحولیاتی رابطہ ذوالفقار یونس، ڈپٹی سیکرٹری موسمیاتی تبدیلی اور ماحولیاتی رابطہ وزارت ڈاکٹر مظہر حیات، سیکرٹری وزارت بین الصوبائی رابطہ ندیم ارشاد کیانی، سیکرٹری وفاقی تعلیم اور دیگر سیمت وزارت پیشہ ورانہ تربیت محی الدین احمد وانی، نیشنل ووکیشنل اینڈ ٹیکنیکل ٹریننگ کمیشن کے سینئر آفیشل نمائندے گلگت بلتستان پلاننگ اینڈ ڈویلپمنٹ ڈیپارٹمنٹ، معروف پاکستانی کوہ پیما نائلہ کیانی پی آر او ٹو پی ایم کے کوآرڈینیٹر محمد ارشد چوہدری، ڈپٹی ڈائریکٹر کلائمیٹ چینج اینڈ انوائرمینٹل کوآرڈینیشن منسٹری محمد سلیم نے شرکت کی۔
