سرگودھا،12جولائی (اے پی پی):چیئر مین کابینہ کمیٹی برائے امن و امان خواجہ سلمان رفیق کی زیرِ صدارت محرام الحرام کے انتظامات کے حوالے سے اجلاس ہوا۔ کمشنر سرگودھا محمد اجمل بھٹی اور ریجنل پولیس آفیسر شارق کمال صدیقی نے سکیورٹی انتظامات پر بریفنگ دی۔ سرگودھا ڈویژن میں تمام 5457 مجالس اور 1220 جلوسوں کے انتظامات مکمل کر لیے گئے ہیں، یکم سے 5 محرم تک سرگودھا میں 2143 مجالس منعقد، 66 جلوس پُرامن انداز میں برآمد ہوئے ،195 ذاکرین و مقررین کی ضلع بندی اور 73 کی زباں بندی کے احکامات جاری کیے۔ بریفنگ میں 158 افراد کو فورتھ شیڈول میں شامل کیا گیا، 7 محرم سے آرمی اور رینجرز کی 16کمپنیاں بھی سکیورٹی ڈیوٹی پر تعینات ہوں گی، عاشورہ پر صرف مخصوص علاقوں میں موبائل سگنلز جام کیے جائیں گے۔
اس موقع پرخواجہ سلمان رفیق نے کہاکہ میں پنجاب کے 8 ڈویژنز میں انتظامات دیکھ چکاہوں، تمام انتطامیہ و پولیس تیار ہے۔ انہوں نے کہاکہ ڈسٹرکٹ انٹیلی جنس کمیٹیاں روزانہ کی بنیاد پر اجلاس بلا رہی ہیں۔ انہوں نے کہاکہ محکمہ داخلہ کے جاری کردہ ایس او پیز پر عملدرآمد یقینی بنایا جا رہا ہے،اتحاد ِبین المسلمین کے اصول کے تحت پُرامن محرم الحرام گزار رہے ہیں۔
اجلاس میں صوبائی وزراء مجتبیٰ شجاع الرحمن، چوہدری شافع حسین اور بلال اکبر خان بھی موجود تھے، اس کے علاوہ سیکرٹری داخلہ نور الامین مینگل ، انسپکٹر جنرل آف پنجاب پولیس ڈاکٹر عثمان انور، ایڈیشنل آئی جی سی ٹی ڈی وسیم سیال، ڈی آئی جی سپیشل برانچ، ایڈیشنل آئی جی سی ٹی ڈی وسیم سیال، ڈی آئی جی سپیشل برانچ بھی اُن کے ہمراہ تھے۔
