جدہ،یکم جولائی(اے پی پی):سعودی جنرل انٹرٹینمنٹ اتھارٹی کے زیر اہتمام جدہ سیزن کا آغاز ہوگیا ہے، جو اگست کے دوسرے ہفتے تک جاری رہے گا، جدہ سیزن میں سعودی عوام اور انکے اہل خانہ کے ساتھ ساتھ یہاں موجود غیر ملکی کمیونٹی کی تفریح کا بھی اہتمام کیا گیا ہے جہاں بچوں، بڑوں کی تفریحات کا اہتمام کیا گیا ہے۔
اس حوالے سے میڈیا سے گفتگو میں جنرل انٹرٹینمٹ اتھارٹی میں کمیونٹی ایونٹس کی سربراہ نوشین وسیم نے کہا کہ دنیا کے بیشتر ممالک سے فنکار جدہ سیزن میں اپنے فن کا مظاہرہ کرینگے۔انہوں نے کہا کہ سیزن میں سعودی عوام کے علاوہ بنگلہ دیش، ہندوستان، سری لنکا ، انڈونیشیا ، فلپائن اور پاکستانی ایونٹس کا اہتمام کیا گیا ہے۔
نوشین وسیم نے بتایا کہ جدہ سیزن میں 2 اگست کو سعودی عرب کے شہر جدہ میں جدہ سیزن کی مناسبت سے پاکستانی نائٹ کا اہتمام کیا گیا ہے۔اس ایونٹ میں پاکستان سے معروف گلوکارہ آئمہ بیگ، بلال سعید، ربیکا خان کے علاوہ پاکستان کا مشہور ڈانس گروپ اورفنکاروں کا گروپ سونو بھی اپنے فن کا مظاہرہ کرینگے۔انہوں نے بتایا کہ تقریب گاہ میں بیس ہزار افراد کی گنجائش ہے۔انہوں نے مزید کہا کہ پاکستانی کمیونٹی اس ایونٹ میں بھرپور شرکت کرے اور اسے کامیاب بنائے، پاکستانی نائیٹ میں پاکستانی ثقافت کو اجاگر کرنے والے مختلف پروگرامز اور پاکستانی کھانوں کے اسٹال بھی موجود ہوں گے۔
واضح رہے کہ جدہ سیزن کے آغاز پر سعودی عوام اور غیرملکی کمیونٹی بشمول پاکستان کمیونٹی نے سعودی حکومت کا شکریہ ادا کیا ہے کہ وہ اپنی عوام کے ساتھ ساتھ یہاں موجود غیر ملکی محنت کشوں اور انکے اہل خانہ کیلئے بھی تفریحی تقاریب کا اہتمام کررہے ہیں۔
