سیالکوٹ،14جولائی(اے پی پی):صوبائی وزیر ٹرانسپورٹ بلال اکبر خاں نے کہا ہے کہ وزیر اعلیٰ پنجاب مریم نواز شریف کی ہدایت پر ضلع سیالکوٹ میں عاشورہ کے دوران مجالس و جلوسوں کی سکیورٹی کے لئے تمام تر انتظامات مکمل کر لئے گئے ہیں، ضلع میں امن و امان اور اتحاد بین المسلمین برقرار رکھنے کیلئے حکومت اور انتظامیہ کو عوامی نمائندوں، علماء کرام، شہریوں کا بھرپور تعاون حاصل ہے۔
ان خیالات کا اظہار انہوں نے کمشنر گوجرانوالہ ڈویژن سید نوید حیدر شیرازی کے ہمراہ سیالکوٹ کے دورہ کے موقع پر کیا، ارکان پنجاب اسمبلی محمد منشا اللہ بٹ، چوہدری فیصل اکرام، رانا محمد عارف ہرناہ، چوہدری طارق سبحانی بھی اس موقع پر موجود تھے جبکہ ڈپٹی کمشنر محمد ذوالقرنین، ڈی پی او حسن اقبال نے بریفنگ دی۔
صوبائی وزیر ٹرانسپورٹ بلال اکبر خاں، کمشنر گوجرانوالہ ڈویژن سید نوید حیدر شیرازی نے ڈپٹی کمشنر آفس میں قائم مرکزی کنٹرول روم کا بھی معائنہ کیا اور مرکزی امام بارگاہ در بتول اڈہ پسروریاں، مرکزی امام بارگاہ مستری محمد عبداللہ کا دورہ کرکے مجالس و جلوس کے روٹس کا بھی معائنہ کیا اور منتظمین سے بھی ملاقات کی۔
صوبائی وزیر ٹرانسپورٹ بلال اکبر خاں نے کہا کہ وزیر اعلیٰ پنجاب کی ہدایت پر کابینہ کمیٹی صوبے کے تمام ڈویژنوں کا دورہ کر چکی ہے اور محرم الحرام کے دوران عزاداروں کو سکیورٹی فراہم کرنے، روٹس کی صفائی کے بہترین انتظامات یقینی بنائے جارہے ہیں، وزیر اعلی پنجاب کی ہدایات پر حکومت پنجاب جلوسوں کے راستوں پر سبیلیں بھی لگائے گی۔انہوں نے کہا کہ سیالکوٹ میں مجالس و جلوسوں کے روٹس پر 109سی سی ٹی وی کیمرے لگائے گئے ہیں، سیف سٹی کے کیمرے، تاجر برادری کی طرف سے لگائے گئے کیمرے بھی نگرانی کیلئے استعمال ہونگے، مجالس و جلوسوں کے دوران 3ہزار سے زائد پولیس افسران و جوان ڈیوٹی پر مامور ہونگے جبکہ کسی بھی ہنگامی صورتحال میں معاونت کیلئے رینجرز بھی الرٹ ہے۔
صوبائی وزیر ٹرانسپورٹ نے ہدایت کی کہ مجالس و جلوسوں کے روٹس پر بجلی کی بلا تعطل فراہمی یقینی بنائی جائے، گیپکو اضافی ٹرانسفارمرز کی دستیابی یقینی بنائے، تاریں درست کی جائیں، ایمرجنسی سٹاف کی ڈیوٹی لگائی جائے، میونسپل کارپوریشن لائٹنگ کاا نتظام یقینی بنائے، اسٹینڈ بائی جنریٹرز موجود ہوں، روٹ پر جہاں درکار ہو ڈی سلٹنگ کی جائے نیز ڈی واٹرنگ سیٹس کا انتظام ہونا چاہئے۔
کمشنر گوجرانوالہ ڈویژن سید نوید حیدر شیرازی نے ہدایت کی کہ بلدیاتی ادارے یقینی بنائے کہ جلوس کے راستے پر کسی طرح کا بلڈنگ میٹریل نہ ہو، مجالس و جلوسوں میں شرکت کرنے والے ہر فرد کی تلاشی لی جائے۔ انہوں نے کہا کہ حکومت اور انتظامیہ کے اقدامات کا مقصد عزاداران کو سکیورٹی اور بہترین سہولیات فراہم کرنا ہے۔
سابق صوبائی وزیر و رکن پنجاب اسمبلی منشا اللہ بٹ نے کہا کہ سیالکوٹ اتحاد بین المسلمین کا گہوارہ ہے، منتخب ارکان اسمبلی محرم الحرام کے دوران لاء اینڈ آرڈر برقرار رکھنے کیلئے اپنا موثر کردار ادا کرنے کیلئے تیار ہیں۔
کنوینر ضلعی امن کمیٹی حافظ اصغر چیمہ نے حکومت پنجاب اور ضلعی انتظامیہ کی طرف سے کئے جانیوالے والے اقدامات پر مکمل اطمینان کا اظہار کرتے ہوئے علما ء کرام کی طرف سے بھرپور تعاون کے عزم کا اظہار کیا۔
