آستانہ،04جولائی(اے پی پی):وزیراعظم محمد شہباز شریف نے شنگھائی تعاون تنظیم کی کونسل کے سربراہی اجلاس سے خطاب کرتے ہوئے کہا ہے کہ ایس سی او خطے کے عوام کی سماجی و معاشی ترقی کے لیے اہم کردار ادا کر رہی ہے، ماحولیات کے تحفظ کے لیے ایس سی او کا اقدام لائق تحسین ہے۔
آئندہ سال کے لئے صدر شی کو ایس سی او کی چیئرمین شپ پر مبارکباد پیش کرتے ہوئے وزیراعظم محمد شہباز شریف نے کہا کہ گزشتہ ایک سال سے ایس سی او کی چیئر کی حیثیت سے قازقستان نے بہترین کردار ادا کیا ہے۔انہوں نے کہا کہ بیلاروس کو ایس سی او میں شمولیت پر مبارکباد پیش کرتے ہیں۔
وزیر اعظم محمد شہباز شریف نے کہا کہ افغانستان میں پائیدار امن ہمارا مشترکہ ہدف ہے، افغانستان کی عبوری حکومت کے ساتھ بات چیت کرنا ہوگی تاکہ وہاں عوام کے مسائل حل ہوں۔انہوں نے کہا کہ افغانستان دہشت گردی کے خلاف مؤثر اقدامات کرے تاکہ اسکی سرزمین کسی دوسرے ملک کے خلاف استعمال نہ ہو۔
وزیراعظم نے کہا کہ ہمارے چیلنجز مشترکہ ہیں ہمیں مل کر ترقی و خوشحالی کے لیے کام کرنا ہے، چاہتے ہیں کہ پڑوسی ممالک ملکر بیٹھیں، خطے کے روشن مستقبل کے لیے ہمیں جغرافیائی اور سیاسی محاذ آرائی سے خود کو آذاد کرنا ہوگا۔انہوں نے کہا کہ پاکستان اپنے محل وقوع کے اعتبار سے تجارت کی اہم گزرگاہ ہے، سی پیک کے ذریعے ترقی و خوشحالی کی منزل کے حصول کی جانب گامزن ہیں۔
وزیر اعظم نے کہا کہ ریاستی دہشت گردی کی شدید الفاظ میں مذمت کی جائے اور اسلاموفوبیا اور لسانیت کے خلاف آواز بلند کرنا ہوگی۔ انہوں نے کہا کہ غربت کے خاتمے کے لیے کام کرنا ہوگا، ایس سی او ترقیاتی منصوبوں کیلئے متبادل فنڈنگ کا طریقہ کار وضع کرے۔
