اسلام آباد، 8 جولائی (اے پی پی): صدر آصف علی زرداری کی زیرِ صدارت گرین پاکستان منصوبے سے متعلق اجلاس میں صدر نے کچھی کینال منصوبے کو 1.5 سال میں مکمل کرنے پر زور دیا۔
پیر کے روز منعقد اجلاس میں صدر مملکت کو گرین پاکستان منصوبے کیلئے چھ اسٹریٹجک نہروں کی تعمیر بارے بریفنگ دی گئی، جس میں صدر نے وفاقی حکومت کی طرف سے منصوبے کی ترجیحی بنیادوں پر بروقت تکمیل یقینی بنانے کیلئے فنڈز کی فراہمی کا اعادہ کیا۔
صدر کو بریفنگ میں بتایا گیا کہ پانی کی دستیابی اور بہاؤ کے حوالے سے درست ڈیٹا شیئرنگ کیلئے 27 ٹیلی میٹری پوائنٹس قائم کیے جائیں گے، کچھی کینال سے بلوچستان کی 713,000 ایکڑ اراضی سیراب ہوگی، جبکہ اسٹریٹجک نہروں میں چشمہ رائٹ بینک ، کچھی ، رینی ، گریٹر تھل ، چولستان اور تھر کینال شامل ہیں اور ان نہروں سے ملکی قابل کاشت رقبہ ، لائیو سٹاک اور ماہی گیری کی صلاحیت بڑھانے میں مدد ملے گی۔
صدر نے پانی کا ضیاع روکنے کیلئے اسٹریٹجک نہروں کی کنکریٹ لائننگ ، آبی تحفظ، پانی کا ضیاع کم کرنے ، پانی کی دستیابی بڑھانے کیلئے پاکستان کے آبپاشی کے شعبے کو جدید خطوط پر استوار کرنے، نہروں کے قریب کے بنجر علاقوں میں ڈرپ آبپاشی کے فروغ اور انڈس ریور سسٹم اتھارٹی کی اصلاح اور بہتر بنانے پر زور دیا۔
صدر نے ہدایت کی کہ سرکاری اراضی کے پیداواری استعمال کیلئے عالمی مالیاتی اداروں اور اسٹاک ایکسچینج سے فنڈنگ کے حصول کیلئے اسٹیٹ لینڈ بینک قائم کیا جائے۔
