لاہور، 26 جولائی (اے پی پی): صوبائی وزیر صحت و چیئرمین کابینہ کمیٹی برائے ڈیزاسٹر مینجمنٹ خواجہ سلمان رفیق نے پی ڈی ایم اے ہیڈ آفس کا دورہ کیا اور صوبہ بھر میں بارشوں کی صورتحال کا بھی جائزہ لیا۔ پی ڈی ایم اے کے افسران نے صوبائی وزیر کو موجودہ موسمی صورتحال اور حفاظتی انتظامات بارے تفصیلی بریفنگ دی۔ اجلاس کے دوران دریاؤں اور ڈیمز میں پانی کی صورتحال کا بھی تفصیلی جائزہ لیا گیا۔
ڈائریکٹر پی ڈی ایم اے نے بتایا کہ پنجاب کے تمام دریاؤں، ڈیمز اور بیراجز میں پانی کی صورتحال نارمل ہے۔ ڈائریکٹر پی ڈی ایم اے نے ڈیرہ غازی خان میں رود کوہیوں کی صورتحال بارے تفصیلی بریفننگ دی۔ صوبائی وزیر صحت نے گفتگو کرتے ہوئے کہا کہ کوہ سلیمان پہاڑوں میں بارشوں کے سبب رود کوہیوں میں سیلابی صورتحال بن سکتی ہے۔ پی ڈی ایم اے پنجاب نے ممکنہ خطرے کے پیش نظر فلڈ ریلیف کیمپس قائم کر دئیے ہیں۔
خواجہ سلمان رفیق نے کہا کہ صوبائی اور ضلعی کنٹرول رومز میں 24 گھنٹے صورتحال کی مانیٹرنگ ہو رہی ہے۔ انسانی جانوں کے تحفظ کے لیے بروقت اقدامات یقینی بنائے جائیں گے۔ عوام الناس سے التماس ہے کہ برسات کے موسم میں احتیاطی تدابیر اختیار کریں۔
خواجہ سلمان رفیق نے دریائی کٹاؤ کی روک تھام بارے سکیموں کا بھی جائزہ لیا۔
