لاہور، 04جولائی(اے پی پی): صوبائی وزراء خواجہ سلمان رفیق، خواجہ عمران نذیر، چیف سیکرٹری پنجاب زاہد اختر زمان کی زیر صدارت صوبائی ٹاسک فورس برائے انسداد پولیو کا سول سیکرٹریٹ میں اجلاس منعقد ہوا۔ اجلاس میں وزیر اعلیٰ پنجاب کی ہدایت پر صوبے سے پولیو کے مکمل خاتمے کیلئے کوششیں تیز کرنے کا جائزہ لیا گیا اور صوبہ کے تمام 14 داخلی اور خارجی پوائنٹس پر پولیو کاؤنٹر قائم کرنے کا بھی فیصلہ کیا گیا۔ اجلاس میں پولیو اور دیگر بیماریوں کے تدارک کیلئے روٹین امیونائزیشن 95 فیصد تک لیکر جانے کا ہدف مقرر کیا گیا۔ سیکرٹری صحت علی جان،سربراہ انسداد پولیو پروگرام پنجاب خضر افضال اور متعلقہ افسران نے اجلاس میں شرکت کی۔ خواجہ سلمان رفیق نے کہا کہ اگلی انسداد پولیو مہم کے دوران تمام صوبائی وزراء پولیو ٹیموں کے ساتھ فیلڈ میں موجود ہوں گے۔ ہر ضلع میں انسداد پولیو کیلئے مختلف میکانزم وضع کریں گے۔خواجہ سلمان رفیق نے کہا کہ ڈپٹی کمشنرز، سی ای او ہیلتھ پولیو کے خاتمے کے مطلوبہ اہداف میں حائل مسائل بارے آگاہ کریں۔ خواجہ عمران نذیر نے کہا کہ پولیو کے خاتمے کیلئے صوبے میں ہیلتھ ایمرجنسی بھی نافذ کرنا پڑی تو کریں گے۔
انہوں نے کہا کہ نقل پذیر آبادی وائرس کے پھیلاؤ کا بڑا ذریعہ ہے۔ پنجاب کی حدود میں داخل ہونے والے تمام بچوں کو ویکسیئن کے قطرے پلائے جائیں گے۔ چیف سیکرٹری نے انسداد پولیو مہم میں نا قص کارکردگی کا مظاہرہ کرنے والے عملہ کے خلاف کارروائی کی ہدایت بھی دی۔ چیف سیکرٹری نے کہا کہ پولیو کا خاتمہ قومی ایجنڈا ہے اس میں کوتاہی کی گنجائش نہیں۔ جو بچہ پولیو کے قطرے پینے سے رہ جاتا ہے وہ پوری دنیا کیلئے پرابلم چائلڈ بن جاتا ہے۔چیف سیکرٹری نے کہا کہ انسداد پولیو مہم سے مطلوبہ نتائج حاصل کرنے کیلئے غیر روایتی لائحہ عمل اختیارکرنا ہوگا۔ سیکرٹری صحت علی جان نے اجلاس کو بریفنگ دیتے ہوئے کہا کہ لاہور سمیت پانچ اضلاع میں انسداد پولیو مہم سات جولائی تک جاری رہے گی۔ راولپنڈی اور گوجرانوالہ کے ماحولیاتی نمونوں میں پولیو وائرس کی تصدیق ہوئی ہے۔
