لاہور،10جولائی (اے پی پی): وزیر خوراک پنجاب بلال یاسین نے فوڈ سیفٹی ٹیموں کے ہمراہ کاہنہ فروٹ منڈی کا دورہ کیا اور مضر صحت کیمیکل کیلشیم کاربائیڈ سے تیار پھل فروخت کرنے والوں کے خلاف کارروائی کرتے ہوئے 900 کلو آموں کو تلف کیا اور سپلائرز کو وارننگ بھی جاری کی۔
وزیر خوراک پنجاب نے کہا کہ تلف کیے گئے پھلوں کو جلدی پکانے کے لیے ممنوعہ کیمیکل کیلشیم کاربائیڈ کا استعمال کیا گیا تھا۔ صوبائی وزیر نے بتایا کہ کیلشیم کاربائیڈ کیمیکل پیکٹ میں رکھ کر آم کے ڈبوں میں رکھا جاتا ہے۔ موسم گرما میں آم کی زیادہ مانگ کی وجہ سے پھل کو جلد پکانے کیلئے کیلشیئم کاربائیڈ کا استعمال کیا جاتا ہے۔ انھوں نے کہا کہ کیلشیم کاربائیڈ سے تیار فروٹ غذائیت کی بجائے صحت کے لیے مضر ثابت ہوتا ہے۔
بلال یاسین نے کہا کہ وزیر اعلیٰ کے حکم پر روزانہ کی بنیاد پر لاہور سمیت پنجاب بھر میں پھلوں کی چیکنگ کو یقینی بنایا جارہا ہے۔ انہوں نے کہا کہ کیلشیم کاربائیڈ سے پکائے جانے والے مضر صحت پھل بیچنے کی اجازت نہیں دی جائے گی،وزیر اعلیٰ پنجاب کے مشن صحت مند پنجاب کو عملی جامہ پہنانے کے لیے تمام تر وسائل بروئے کار لائے جارہے ہیں۔ انہوں نے کہا کہ پنجاب میں غذائیت سے بھرپور خوراک اولین ترجیح ہے اور جعلسازی پر زیرو ٹالرینس پالیسی ہے۔
