لاہور،17جولائی(اے پی پی):صوبائی وزیر صحت و چیئرمین کابینہ کمیٹی برائے امن و امان خواجہ سلمان رفیق، صوبائی وزیر خوراک بلال یاسین اور صوبائی وزیر خزانہ مجتبی شجاع الرحمن نے یوم عاشور کے موقع پر محکمہ داخلہ کے سینٹرل کنٹرول روم کا دورہ کیا اور صوبہ بھر میں مرکزی جلوسوں کی لائیو مانیٹرنگ کی۔ اس موقع پر سیکرٹری داخلہ پنجاب نور الامین مینگل نے وزرا کو صوبہ بھر میں موجودہ صورتحال بارے بریفنگ دی۔
وزیر صحت خواجہ سلمان رفیق نے کہاکہ وزیر اعلی پنجاب کی ہدایت پر پورا عشرہ محرم انتظامات کی نگرانی کرتے ہوئے فیلڈ میں گزارا،امن و امان کے قیام کیلئے تمام انتظامیہ اور پولیس فیلڈ میں متحرک ہیں۔ انہوں نے کہاکہ تمام اضلاع کیلئے پیغام ہے کہ محکمہ داخلہ کے جاری کردہ ضابطہ اخلاق پر عملدرآمد یقینی بنائیں۔
سیکرٹری داخلہ پنجاب نے کہا کہ پنجاب میں عاشورہ کے موقع پر 3023جلوس اور 2353مجالس ہو رہی ہیں، تمام مجالس اور جلوسوں کو اے،بی اور سی کیٹیگری کے لحاظ سے مانیٹر کیا جا رہا ہے جبکہ پنجاب بھر کی مجالس اور جلوسوں کی میپ پر جیو ٹیگنگ کی گئی ہے۔ انہوں نے کہاکہ تمام مقامات کو جدید کیمروں سے سینٹرل کنٹرول روم میں مانیٹر کیا جا رہا ہے،پنجاب کابینہ کے وزرا تمام اضلاع میں جاکر انتظامات کی نگرانی کر رہے ہیں۔
اس موقع پر ایڈیشنل سیکرٹری ہوم، ایڈیشنل سیکرٹری انٹرنل سکیورٹی اور متعلقہ حکام بھی موجود تھے۔
