لاہور، 26 جولائی (اے پی پی): وزیر اعلی پنجاب مریم نواز شریف کی جانب سے صوبائی وزراء صحت خواجہ سلمان رفیق اور خواجہ عمران نذیر نے سی ایم چائلڈ ایمرجنسی کیئر پروگرام لانچ کر دی ہے ۔
سی ایم چائلڈ ایمرجنسی کیئر پروگرام کی لانچنگ 27 ویں سی ای اوز اور ایم ایس کانفرنس کے دوران کی گئی ۔سیکرٹری صحت پنجاب علی جان خان نے کانفرنس کے دوران شعبہ صحت بارے ترجیحات پر روشنی ڈالی۔اس موقع پر چائلڈ لائف فاؤنڈیشن کے چیئرمین ڈاکٹر احسن ربانی بھی موجود تھے۔
صوبائی وزیر پرائمری اینڈ سیکنڈری ہیلتھ کیئر خواجہ عمران نذیر نے اس موقع پر اظہار خیال کرتے ہوئے کہا کہ تمام ڈی ایچ کیو، ٹی ایچ کیو ہسپتالوں میں چائلڈ ایمرجنسی سہولت سے اموات کی شرح میں 50 فیصد کمی ہو گی، وزیر اعلی پنجاب کی واضح ہدایات ہیں تمام ہسپتالوں میں سیوریج، واشرومز، وارڈز کی صفائی پر کوئی سمجھوتہ نہ کیا جائے، مون سون صورتحال کے باعث تمام ہسپتالوں کی چھتوں کی صفائی کو بھی یقینی بنایا جائے۔ انہوں نے کہا کہ تمام سی ای اوز ہیلتھ ہسپتالوں کے معاملات بہتر کرنے کے لئے ایوننگ ریویو اجلاس روازنہ منعقد کریں، صوبائی وزرا صحت، سیکرٹری صحت ایوننگ ریویو اجلاس میں کسی بھی وقت سرپرائز شرکت کر سکتے ہیں۔
خواجہ عمران نذیرنے کہا کہ کلینک آن ویلز اور فیلڈ ہسپتالوں کا منصوبہ حکومت پنجاب کیلئے نیک نامی کا باعث بنے ہیں۔ آج تک کلینک آن ویلز کے ذریعے 18 لاکھ مریضوں کو بہترین طبی سہولیات فراہم کر چکے ہیں۔ فیلڈ ہسپتالوں کے ذریعے تین لاکھ مریضوں کو علاج و معالجہ کی سہولیات فراہم کر چکے ہیں۔کلینک آن ویلز پر حکومت کے سالانہ ایک ارب روپے خرچ ہوں گے۔انہوں نے کہا کہ ابھی تک کینسر، ہیپاٹائٹس اور ٹی بی سمیت دیگر بیماریوں میں مبتلا چالیس ہزار سے زائد مریضوں کو مفت ادویات ان کے گھروں میں فراہم کر چکے ہیں۔ سرکاری ہسپتالوں میں 3 کلرز کی بیڈ شیٹس موجود ہیں،گندی چادریں تبدیل نہ کی گئیں تو ایم ایس ذمہ دار ہوگا۔
صوبائی وزیر صحت خواجہ سلمان رفیق نے اس موقع پر اظہار خیال کرتے ہوئے کہا کہ چائلڈ لائف فاؤنڈیشن کے تمام ذمہ داران کو نیک کام کے آغاز پر مبارکباد دینا چاہتا ہوں۔حکومت پنجاب صحت کے شعبہ میں خاص توجہ دے رہی ہے۔انہوں نے کہا کہ حال ہی میں پنجاب کے مختلف ہسپتالوں میں دیکھے گئے حالات کی نشاندہی کر رہا ہوں۔ موٹر وے پر ایمرجنسی سروسز کا آغاز کیا جا رہا ہے،موٹروے کے ہر 30 کلو میٹر پر ریسکیو کی گاڑی موجود ہوگی۔
کانفرنس میں سپیشل سیکرٹریز محمد اقبال اور محمد احمد، ایڈیشنل سیکرٹریز خضر افضال، بابر اور ڈاکٹر یونس، ڈی جی ہیلتھ سروسز ڈاکٹر الیاس گوندل، ڈی جی ڈرگز ڈاکٹر سہیل، ڈاکٹر عاصم الطاف، ڈاکٹر یداللہ، ڈائریکٹر ای پی آئی ڈاکٹر مختار اعوان، ڈپٹی سیکرٹریز اور تمام اضلاع کے سی ای اوز اور ایم ایس حضرات نے شرکت کی۔
