اسلام آباد،9 جولائی(اے پی پی): وزیراعظم محمد شہباز شریف سے برطانوی ایجوکیشنسٹ اور برطانوی وزیراعظم کے ڈیلیوری یونٹ کے سابق سربراہ سر مائیکل باربر کی زیر قیادت وفد نے منگل کو یہاں ملاقات کی۔ وفد میں برطانوی فارن، ڈویلپمنٹ اور کامن ویلتھ آفس کی ڈائریکٹر جو موئیر، اور سینئر گورننس ایڈوائزرز نوید عزیز اور میٹ کلینسی شامل تھے۔
ملاقات میں وفد نے وزیر اعظم سے گفتگو میں کہا کہ پاکستان کی ترقی ہماری ترقی ہے اور برطانیہ پاکستان کو ہر شعبے میں بھرپور مدد اور تعاون فراہم کرے گا۔ وزیر اعظم شہباز شریف نے کہا کہ پاکستان اور برطانیہ کے تاریخی دو طرفہ تعلقات دہائیوں پر محیط ہیں اور وقت کے ساتھ مزید مضبوط ہو رہے ہیں، برطانیہ پاکستان میں مختلف شعبوں میں معاونت فراہم کر تے ہوئے پاکستان کا اہم شراکت دار ہے جس کیلئے ہم برطانوی حکومت کے شکر گزار ہیں۔
وزیر اعظم شہباز شریف نے کہا کہ حکومت پاکستان کی معاشی بحالی کے لئے مؤثر اقدامات اٹھا رہی ہے، تمام ریاستی ملکیتی اداروں کی نجکاری کی جا رہی ہے، فیڈرل بورڈ آف ریونیو سمیت معیشت کی ڈیجیٹائزیشن کے لئے اقدامات کئے جا رہے ہیں، حکومتی اخراجات میں کمی کے حوالے سے غیر فعال اداروں کو ختم کرکے ڈاؤن سائیزنگ کی پالیسی پر عمل کیا جا رہا ہے۔
وزیر اعظم نے کہا کہ برآمدات اور ٹیکس بیس میں اضافے کے لئے اقدامات اٹھائے جا رہے ہیں، پاکستان سے انفارمیشن ٹیکنالوجی اور زراعت سے متعلقہ برآمدات کے حوالے سے بے پناہ استعداد ہے اور وفاقی وزارتوں کی کارکردگی جانچنے کے حوالے سے ٹاسک مینیجمنٹ سسٹم کا قیام عمل میں لایا جا چکا ہے۔
سر مائیکل باربر نے حکومت کے معاشی بحالی کے پلان کی تعریف کرتے ہوئے کہا کہ حکومت معاشی اصلاحات کے حوالے سے ٹھیک سمت میں جا رہی ہے اور امید ہے کہ موثر قیادت میں پاکستان جلد ہی معاشی مشکلات قابو پانے میں کامیاب ہو گا۔
ملاقات میں وفاقی وزیر اقتصادی امور احد خان چیمہ ، وفاقی وزیر خزانہ و محصولات محمد اورنگزیب ، وفاقی وزیر صنعت و پیداوار رانا تنویر حسین ، وزیر مملکت برائے انفارمیشن ٹیکنالوجی و ٹیلی کام شزا فاطمہ ، وزیراعظم کے کوآرڈینیٹر رانا احسان افضل ، ڈپٹی چیئرمین پلاننگ کمیشن جہانزیب خان اور متعلقہ اعلیٰ سرکاری افسران نے شرکت کی۔
