لاہور،25جولائی(اے پی پی):وزیراعلی پنجاب مریم نواز شریف سے چائلڈ لائف فائونڈیشن کے وفد نے ملاقات کی۔وفد میں وائس چیئرمین چائلڈ لائف فائونڈیشن محمد سہیل ٹبہ،چیف ایگزیکٹو ڈاکٹر احسن ربانی شامل تھے۔چائلڈ لائف فائونڈیشن کے وفد نے ہیلتھ سیکٹر میں اصلاحات سے متعلق وزیراعلی مریم نواز کے ویژن،خدمات اورمثبت تبدیلیوں کو سراہا۔م
لاقات میں پنجاب بھر میں بچوں کو بہترین طبی سہولیات کی فراہمی کیلئے اشتراک کار کا جائزہ لیا گیا اور ہسپتالوں میں سیکنڈ شفٹ کے اجرا کی تجاویز پر غور کیا گیا۔بیسک چائلڈ ہیلتھ کیئر سٹرکچر میں بہتری کے لیے پنجاب حکومت کے ساتھ تعاون کے لئے امکانات پر بھی تبادلہ خیال ہوا۔دور دراز علاقوں میں چائلڈ ہیلتھ سے متعلق ٹیلی میڈیسن اور ڈیجیٹل ہیلتھ سروسز کے آغاز پر بات چیت کی گئی۔
وزیراعلی مریم نواز نے کہاکہ بچوں کی صحت اور تندرستی سب سے اہم ہے۔ پنجاب میں ہر بچے کیلئے بہترین علاج کی اعلی سہولت تک رسائی کیلئے اقدامات کررہے ہیں۔ معصوم بچوں کی زندگیاں بچانے اور بہتر ہیلتھ سروسز فراہم کرنے کے لیے پرعزم ہیں۔
وائس چیئرمین چائلڈ لائف فائونڈیشن نے کہاکہ پنجاب میں ہیلتھ سیکٹر میں نمایاں مثبت تبدیلیاں رونما ہوئی ہیں اور بتایا کہ سرکاری ہسپتالوں میں159 ٹیلی میڈیسن سیٹلائٹس سینٹرز قائم کیے گئے ہیں۔کوالٹی ایمرجنسی کیئر کی بدولت بچوں کی اموات میں50 فیصد کمی آئی ہے۔ڈاکٹر احسن ربانی نے بتایا کہ ایمرجنسی رومز میں24 گھنٹے فری سروسز فراہم کی جاتی ہیں۔
سینٹر پرویز رشید،چیف سیکرٹری زاہد اختر زمان اوردیگر حکام بھی موجود تھے۔
