لاہور،20جولائی(اے پی پی):وزیر علیٰ مریم نواز نے محرم الحرام کے دوران بہترین انتظامات پر اپنی ٹیم کو سراہا اور”ویری گڈ اینڈ ویل ڈن”کہا۔وزیر اعلیٰ پنجاب مریم نواز کی وزرا،کیبنٹ کمیٹی برائے لا اینڈآرڈر، کمشنرز، ڈپٹی کمشنرز، آر پی اوز،ڈی پی اوزسے ویڈیو لنک میٹنگ ہوئی جس میں آئی جی،ہوم سیکرٹری اور دیگر افسران بھی شامل تھے۔ وزیراعلیٰ نے محرم الحرام میں سکیورٹی انتظامات کی تعریف کی اور عزاداروں کیلئے سبیل آن ویل کو سراہا۔ وزیر اعلی نے پہلی مرتبہ حکومتی سطح پر نیاز کی فراہمی کو قابل تحسین قرار دیا۔ انہوں نے باری باری سب کا نام لیکر شاباش دی اور سراہا۔
وزیراعلی مریم نواز نے اس موقع پر گفتگو کرتے ہوئے کہاکہ قائد محمد نوازشریف کی جانب سے بھی سب کو مبارکباد اور شاباش پیش کرتی ہوں، میری ٹیم نے عمدہ انتظامات کرکے میرا سر فخر سے بلند کیا، وزرا ء نے یوم عاشورہ سے پہلے خود جاکر علما ء اکرام سے ملاقات کی،ہدایات پر من و عن عملدرآمد کرکے امن و امان کو یقینی بنایا گیا،ہر مکتبہ فکر کے علما کرام کو ملاقات کرکے اعتماد میں لیا گیا۔ وزرا، افسران اور پولیس دن رات فیلڈ میں رہی۔ بڑے جلوسوں کی ڈرون کے ذریعے مانیٹرنگ سود مند رہی۔ شیخوپورہ میں واقعہ کے ذمہ داروں کو فوری گرفتار کرنے کا حکم دیا۔ موبائل فون اور انٹرنیٹ سروسز کو بند کیے بغیر سکیورٹی انتظامات بہت بڑی کامیابی ہے۔ پنجاب بھر میں ٹریفک کا انتظام بھی تسلی بخش رہا۔
وزیر علیٰ مریم نواز نے کہاکہ محر م الحرام کے دوران پولیس اور دیگر اداروں کے درمیان اشتراک کار کا بہترین مظاہر ہ دیکھنے کو ملا۔ سبیلوں پر لمبی لائنوں کے باوجود مثالی نظم وضبط تھا، لوگ صبر سے اپنی باری کا انتظار کررہے تھے۔ محرم کے جلوسوں پر عرق گلاب کا چھڑکاؤ اچھا عمل تھا، جلوس کے خاتمے پر روٹس کی برق رفتاری سے صفائی مستحسن عمل ہے۔انہو ں نے کہاکہ تمام اضلاع میں انتظامیہ اورپولیس نے دلچسپی لیکر کام کیا اور چیلنج کو پورا کیا۔محرم کے انتظامات پر اہل تشیع علما اور اکابرین نے بھرپور شکریہ ادا کیا۔ہر ٹاسک میں کامیابی ٹیم کی کاوشوں کی مرہون منت ہے۔وزرا، کیبنٹ کمیٹی، ہوم سیکرٹری، آئی جی،کمشنرز اور سب نے بھرپور کام کیا۔ پولیس والے خود کو خطرے میں ڈال کر دوسروں کی حفاظت کرتے ہیں۔ انہو ں نے کہاکہ پولیس کی حفاظت کے لئے تمام تر میسر وسائل فراہم کریں گے۔ کسی سیکورٹی اہلکارکی شہادت کی خبر دل پر بھاری گزرتی ہے۔آنے والے دنوں میں لا اینڈ آرڈر کی بہتری کے لئے فول پروف انتظامات کریں گے۔ ایران اور عراق جانے والے زائرین کو ممکنہ سہولت فراہم کریں گے۔
سینیٹر پرویز رشید، سینئر منسٹر مریم اورنگزیب، صوبائی وزیر اطلاعات و ثقافت عظمیٰ زاہد بخاری، چیئرپرسن سی ایم ایلوایشن سیل بریگیڈئیر (ر)بابر علا ؤالدین اور دیگر حکام بھی موجود تھے۔
