اسلام آباد،23 جولائی ( اے پی پی): وزیر اعظم محمد شہباز شریف سے چیئرمین زھانگ بن کی قیادت میں چینی کمپنی ہینگینگ ٹریڈ کمپنی کے وفد نے منگل کو یہاں ملاقات کی ۔
وفد سے گفتگو میں چینی سرمایہ کاری کو خوش آمدید کرتے ہوئے وزیراعظم نے کہا کہ میرے حالیہ دورہء چین کے دوران پاکستان اور چین کی کمپنیوں کے درمیان بڑے پیمانے پر بزنس ٹو بزنس معاہدے طے پائے جو کہ انتہائی خوش آئند امر ہے ۔انہوں نے کہا کہ پاکستان زراعت کے شعبے میں چین کی کامیابی سے استفادہ حاصل کرنا چاہتا ہے۔
وزیراعظم نے گوادر پورٹ اتھارٹی کو چینی کمپنیوں کو ہر ممکن سہولیات دینے کی ہدایت دیتے ہوئے گوادر فری زون میں یوٹیلیٹیز کی بلا تعطل فراہمی یقینی بنانے کی ہدایت بھی کی۔
وزیراعظم کو وفد کی جانب سے بریفنگ میں بتایا گیا کہ ہینگینگ ٹریڈ کمپنی پاکستان میں زراعت، لائیو اسٹاک، ادویات اور دیگر شعبوں میں سرمایہ کاری کر رہی ہے، ہینگینگ ٹریڈ کمپنی 50 ملین ڈالر کی لاگت سے گوادر میں جدید سہولیات سے آراستہ ذبحہ خانہ (سلاٹر ہاؤس) تعمیر کر رہی ہے جس کی تکمیل سے پاکستان کے لائیو اسٹاک کے شعبے سے چین کو 30 ملین امریکی ڈالرز تک سالانہ کی برآمدات ہوں گی، مقامی لوگوں کیلئے ایک ہزار کے قریب نئی ملازمتوں کے مواقع پیدا ہوں گے اور ہینگینگ ٹریڈ کمپنی فارماسیوٹیکل مصنوعات کو گوادر فری زون میں پراسیس کر کے چین کو برآمد کر رہی ہے۔
ملاقات میں وفاقی وزیر اقتصادی امور احد خان چیمہ ، وفاقی وزیر قومی غذائی تحفظ و تحقیق رانا تنویر حسین ، وزیر مملکت برائے خزانہ علی پرویز ملک اور متعلقہ اعلیٰ سرکاری افسران نے شرکت کی۔
