لاہور، 21 جولائی (اے پی پی): پنجاب حکومت نے ٹیکنیکل ایجوکیشن اینڈ ووکیشنل ٹریننگ اتھارٹی (ٹیوٹا) کے اداروں میں مارکیٹ کی ڈیمانڈ کے مطابق جدید کورسز پڑھانے کا فیصلہ کیا ہے۔
وزیر اعلیٰ پنجاب مریم نواز کی زیر صدارت اجلاس میں ٹیوٹا میپنگ پلان کی حتمی شکل کے لیے سفارشات کا جائزہ لیا گیا۔مریم نواز نے کہا کہ اقتصادی ترقی، بے روزگاری میں کمی کے لیے ٹیکنیکل کورسز میں جدت وقت کی ضرورت ہے۔وزیر اعلیٰ پنجاب نے ٹیوٹا پراجیکٹس میں پبلک پرائیویٹ پارٹنرشپ کو فروغ دینے کی ہدایت کی۔
اجلاس میں کورین، جاپانی، جرمن، چینی اور عربی لینگویج کورسز متعارف کرانے کی منظوری دی گئی، اور اسکلڈ جاب کے لیے پنجاب اوورسیز ایمپلائمنٹ پروموٹنگ اتھارٹی کے قیام کی تجویز پر اتفاق کیا گیا۔اجلاس میں لارج اسکیل کنسٹرکشن ڈویلپرز کے تعاون سے ہیوی مشینری ڈرائیونگ، آپریٹر کورس کی آؤٹ سورسنگ کا فیصلہ بھی کیا گیا۔
وزیر اعلیٰ مریم نواز نے 9 شہروں میں 45 ویلڈنگ ورک شاپس بنانے کی منظوری دے دی۔ٹیوٹا میں ہیومن ریسورس کی کمی دور کرنے کے لیے ایک ہزار ملازمین کی بھرتی کی تجویز پر اتفاق کیا گیا، ٹریننگ مٹیریل کا ماہانہ بجٹ 2 ہزار روپے فی طالب علم کرنے کی تجویز پر بھی غور کیا گیا۔
