اسلام آباد،11 جولائی (اے پی پی): وفاقی وزیر منصوبہ بندی ، ترقی اور خصوصی اقدامات احسن اقبال چائنہ انٹرنیشنل ڈویلپمنٹ کارپوریشن ایجنسی (سڈکا) کے تحت منعقد کی جانے والی مشترکہ ترقی پر اعلیٰ سطحی کانفرنس میں شرکت کے لیے چائنہ پہنچ گئے ۔ بیجنگ، چائنہ پہنچ کر اپنے خصوصی پیغام میں وفاقی وزیر احسن اقبال نے کہا کہ چین کے صدر شی جن پنگ نے عالمی ترقیاتی لائحہ عمل کی تشکیل میں پہل کی ہے،اسکا مقصد یہ ہے کہ دنیا کے ممالک سماجی و اقتصادی ترقی کے لیے ایک دوسرے سے اشتراک کریں۔انہوں نے کہا کہ اس کانفرنس میں دنیا کے دیگر اعلی عہدیدار اور وزرا کے ساتھ اپنے تجربات پر تبادلہ خیال کرنے کا موقع فراہم ہوگا۔ اس کے ساتھ ساتھ وزیر اعظم پاکستان کے دورہ چین کے دوران طے پانے والے فیصلوں پر عمل درآمد کے لیے چینی حکام سے بات چیت بھی ہوگی۔
وفاقی وزیر احسن اقبال نے کہا کہ سی پیک کا دوسرا مرحلہ جسے چین نے خود “اپ گریڈیڈ” مرحلہ کہا ہے اسکے تحت ہم پر امید ہیں کہ ترقی کا ایک نیا دور شروع کریں گے۔
