اسلام آباد،02 جولائی (اے پی پی): وفاقی وزیر اطلاعات عطاءاللہ تارڑ سے کینیڈا کی ہائی کمشنر لیسلی اسکینلون کی ملاقات منگل کےروز ہوئی جس میں پاکستان اور کینیڈا کے مابین دوطرفہ تعلقات،حکومت کے معاشی اقدامات سمیت مختلف اہم امور پر تبادلہ خیال کیا گیا۔
کینیڈا کی ہائی کمشنر نے وفاقی وزیر اطلاعات کو وزارت اطلاعات کے ساتھ ثقافت و قومی ورثہ کا اضافی قلمدان سنبھالنے پر مبارکباد دی۔
وزیر اطلاعات نے پاکستان اور کینیڈا کے درمیان مضبوط تعلقات کی اہمیت پر زور دیتے ہوئے کہا کہ دونوں ممالک کے درمیان دیرپا اور کثیر الجہتی تعلقات ہیں اور کینیڈا پاکستان کا مرکزی ترقیاتی شراکت دار ہے۔
کینیڈین ہائی کمشنر نے حکومت پاکستان کے معاشی اقدامات کو سراہا جبکہ عطا تارڑ نے دونوں ممالک کے درمیان معاشی تعلقات کو مزید مضبوط کرنے کی ضرورت پر زور دیتے ہوئے کہا کہ معاشی تعلقات میں اضافہ دونوں ممالک کے مفاد میں ہے۔
