اسلام آباد،19 جولائی(اے پی پی):وفاقی وزیر داخلہ و انسداد منشیات محسن نقوی سے سری لنکا کے ہائی کمشنر ایڈمرل (ر) رویندرا چندرا سری وجے گونارتنے نے جمعہ کو یہاں ملاقات کی،جس دوران باہمی دلچسپی کے امور اور سری لنکا میں قید پاکستانی شہریوں کی رہائی کے حوالے سے تبادلہ خیال کیا گیا۔
ملاقات میں گزشتہ کئی سال سے سری لنکا میں پھنسے پاکستانی قیدیوں کو 7 روز میں پاکستان واپس لانے کا فیصلہ کیا گیا اور سری لنکا میں پاکستانی قیدیوں کی وطن واپسی کے لیے دونوں جانب سے ضروری کارروائی جلد مکمل کرنے پر اتفاق کیا گیا۔
سری لنکن ہائی کمشنر نے پاکستانی قیدیوں کی رہائی کے لیے ہرممکن تعاون کی یقین دہانی کرائی۔وفاقی وزیرداخلہ محسن نقوی نے قیدیوں کی وطن واپسی کے لیے تعاون پر سری لنکن ہائی کمشنر کاشکریہ ادا کیا اور کہا کہ سری لنکا میں قیدپاکستانی شہریوں کی وطن واپسی کے لیے تمام اقدامات کو جلد از جلد حتمی شکل دی جا رہی ہے۔
ملاقات میں انسداد منشیات اور بارڈر سیکورٹی کے امور پر بھی گفتگو کی گئی۔وزیر داخلہ محسن نقوی نے کہا کہ سری لنکا اور پاکستان کے درمیان تعلقات وقت کے ساتھ مضبوط ہوئے ہیں،باہمی تعلقات کو مزید آگے بڑھانے کے لئےتیزی سے اقدامات کرنے کی ضرورت ہے۔ انہوں نے کہا کہ انسداد منشیات اور بارڈر سیکورٹی کے حوالے سے باہمی تعاون کو فروغ دینا وقت کا تقاضا ہے۔
اس موقع پر سری لنکا کے ہائی کمشنر ایڈمرل (ر) رویندرا چندرا سری وجے گونارتنے نے کہا کہ سری لنکا پاکستان کے ساتھ اپنے تعلقات کوبہت اہمیت دیتا ہے۔
