آستانہ : 03 جولائی (اے پی پی): وزیراعظم محمد شہباز شریف کی ترکیہ کے صدر رجب طیب اردگان اور آذربائجان کے صدر الہام علییوف کے ہمراہ بدھ کے روز سہ فریقی اجلاس میں شریک ہوئے اور دنیا کے تین اہم خطوں کے ممالک کے درمیان باہمی دلچسپی کے مختلف امور پر تفصیلی بات چیت ہوئ۔
اجلاس میں علاقائی اور عالمی امن و خوشحالی کے حوالے سے تبادلہء خیال اور پائیدار معاشی ترقی کی ترویج کے لئے علاقائی تعاون کے فروغ کے حوالے سے بات چیت کی گئ، جبکہ اس سے پہلے تینوں ممالک کے وزرائے خارجہ کے مابین سہ فریقی بات چیت کا دور ہو چکا ہے۔
وزیر اعظم شہباز شریف نے کہا کہ پاکستان ترکیہ اور آذر بائیجان کے ساتھ اپنے تعلقات کو قدر کی نگاہ سے دیکھتا ہے اور یہ کہ پاکستان ترکیہ اور آذر بائیجان کے ساتھ معیشت، توانائی ، سیاحت، موسمیات ، ثقافت ،تعلیم اور انفارمیشن ٹیکنالوجی کے شعبوں میں سہ فریقی تعاون کو فروغ دینے پر یقین رکھتا ہے۔
وزیراعظم نے تینوں ممالک کے مابین معیشت اور سرمایہ کاری کے شعبوں میں سہ فریقی تعاون کو فروغ دینے کے لئے حکمت عملی ترتیب دینے کی ضرورت پر بھی زور دیا۔
