اسلام آباد،23جولائی (اے پی پی):وفاقی وزیر صنعت و پیداوار رانا تنویر حسین نے کہا ہے کہ چینی کی قیمتوں میں اضافہ کسی صورت برداشت نہیں کیا جائے گا، چیف سیکرٹریز چینی کی ریٹیل پرائس مستحکم رکھنے کے لئے ہر ممکن اقدامات اٹھائیں۔
ان خیالات کا اظہار انہوں نے منگل کو یہاں شوگر ایڈوائزری بورڈ کے اجلاس کی صدارت کے دوران کیا۔ اجلاس میں چینی کے سٹاک کی دستیابی اور قیمتوں کا جائزہ لیا گیا۔ اجلاس میں وفاقی وزیر کو بتایا گیا کہ چینی کی ایکس ملز کی قیمت حالیہ مہینوں میں مستحکم رہی ہے۔
اس موقع پر وفاقی وزیر صنعت نے کہا کہ چیف سیکرٹریز چینی کی ریٹیل پرائس مستحکم رکھنے کے لئے ہر ممکن اقدامات اٹھائیں۔ انہوں نے صوبوں کو بھی چینی کی خوردہ قیمتوں کی سختی سے نگرانی کرنے کی ہدایت کی۔ رانا تنویر حسین نے کہا کہ چینی کی قیمتوں کو برقرار رکھنا حکومت کی بنیادی ذمہ داری ہے اور چینی کی قیمتوں میں اضافہ کسی صورت برداشت نہیں کیا جائے گا ۔
