لاہور، 28 جولائی (اے پی پی): صوبائی دارالحکومت میں موسلادھار بارش کے پیش نظر کمشنر لاہور زید بن مقصود نے لکشمی چوک،قرطبہ چوک، نابھہ روڈ،سپریم کورٹ رجسٹری روڈ،جیل روڈ و دیگر علاقوں کا دورہ کیا۔کمشنر لاہور کو ایم ڈی واسا نے نکاسی آب آپریشن کی تفصیلات سے آگاہ کیا۔
کمشنر نے کہا کہ آج لاہور میں زیادہ سے زیادہ 74ایم ایم بارش ریکارڈ ہوئی،7 مقامات پر 55 ایم ایم سے زیادہ ہوئی ہے۔انھوں نے کہا کہ لاہور کے بیشتر علاقوں میں موسلادھار بارش ہوئی ہے، واسا ٹیمیں فیلڈ میں پوری استعداد سے کام کررہی ہیں،نکاسی آب کیلئے تمام علاقوں پر یکساں توجہ دی جا رہی ہے،اکثر جگہ سے نکاسی آب ہوچکی ہے۔
کمشنر زیدبن مقصود نے کہا کہ پہلے مرحلے میں تمام مین روڈز اور ان سے منسلک سب روڈز کو کلیر کیا جارہا ہے، تمام انتظامیہ فیلڈ میں موجود ہے،نکاسی آب کیلئے تمام وسائل بروئے کار لائے جارہے ہیں۔انہوں نے کہا کہ تمام سورنگ پوائنٹس،جمع بارشی پانی نکاسی کیلئے ضروری مشیینری مکمل صلاحیت سے کام کررہی ہے۔واسا کی ایمرجنسی ریسپانس کیمپس اور فیلڈ سٹاف نکاسی آب کیلئے شہر میں متحرک ہے۔
کمشنر نے واسا سکرز مشینزاور ڈی واٹرنگ سیٹس سے نکاسی آب آپریشن کا جائزہ لیا۔فیلڈ میں کام کرنے والی مشینری کے جنریٹرز کو مکمل نکاسی آب ہونے تک مکمل فعال رکھنے کی ہدایت بھی کی۔ انھوں نے کہا کہ سورنگ پوائنٹس و نشیبی پر مکمل فوکس ہے اور افسران فیلڈ میں مانیٹرنگ کررہے ہیں۔
