لاہور، 13جولائی(اے پی پی): گورنر پنجاب سردار سلیم حیدر خان سے پاکستان میں عراق کے سفیر حامد عباس لفته نے ہفتہ کو یہاں پنجاب ہاؤس اسلام آباد میں ملاقات کی۔ملاقات میں دو طرفہ تعلقات کو فروغ دینے پر اتفاق کیا گیا۔
گورنر پنجاب نے مقدس مقامات کی زیارات کے لیے جانے والے زائرین کو سہولیات فراہم کرنے پر عراقی حکومت کے کردار کو سراہا۔ملاقات میں لاہور سے پی آئی اے اور عراقی ہوائی کمپنی (Airline) کے ذریعے زائرین کی روانگی پر بھی غور کیا گیا۔
گورنر پنجاب نے کہا کہ عراق کے ساتھ پاکستان کے مضبوط سفارتی تعلقات ہیں ۔ دونوں ممالک مشترکہ اسلامی اور ثقافتی پس منظر رکھتے ہیں۔انہوں نے کہا پاکستان اور عراق کی عوام کے دل ایک ساتھ دھڑکتے ہیں۔ دونوں ممالک کے درمیان مختلف شعبوں میں تعاون جاری ہے۔ انہوں نے کہا کہ فلسطین کے مسئلے پر اسرائیلی مظالم کے خلاف دونوں ممالک کا یکساں مؤقف ہے۔
