کوئٹہ، 04 اگست (اے پی پی):وزیراعلیٰ بلوچستان میر سرفراز بگٹی نے کہا ہے کہ پولیو مہم کی بلوچستان میں احسن انداز سے روانی کے لیے انسداد پولیو ٹیموں کو مکمل انتظامی تعاون فراہم کیا جائے گا اور پولیو پروگرام میں کسی بھی قسم کا رخنہ ڈالنے والوں کے خلاف سختی سے کارروائی کی جائے گی۔
وزیراعلیٰ بلوچستان میر سرفراز بگٹی سے وزیر اعظم پاکستان کی فوکل پرسن برائے انسداد پولیو عائشہ رضا فاروق نے اتوار کو یہاں وزیراعلیٰ سیکرٹریٹ میں ملاقات کی ۔ ملاقات میں صوبے میں پولیو کی روک تھام ، انسداد پولیو مہم کی بلوچستان میں کامیابی سے روانی اور متعلقہ امور پر تبادلہ خیال کیا گیا ۔
وزیراعلیٰ سے بات چیت کرتے ہوئے عائشہ رضا فاروق نے کہا کہ بلوچستان سے پولیو کے کیسز رپورٹ ہونا باعث تشویش ہے جس کے لئے آئندہ تین ماہ کے دوران صوبے میں خصوصی انسداد پولیو مہم شروع کی جائے گی ، یہ مہم رواں سال کے ماہ ستمبر ، اکتوبر اور نومبر میں عمل میں لائی جائے گی ۔
وزیراعلیٰ نے سیکرٹری صحت کو ہدایت کی کہ محکمہ صحت پولیو اور حفاظتی ٹیکہ جاتی پروگرام میں کسی بھی کوتاہی کا مظاہرہ نہ کرے اور اس حوالے سے ایک معیاری مہم چلائی جائے ۔ انہوں نے ہدایت کی کہ ہائی رسک والے اضلاع میں ایکسٹینڈڈ پروگرام آف امیو نائزیشن(ای پی آئی ) اگلے چند ماہ تک تواتر سے چلایا جائے ۔
وزیراعلیٰ نے کہا کہ ڈپٹی کمشنرز کی زیر نگرانی انسداد پولیو پروگرام کی مہم کو کامیابی سے رواں رکھا جائے گا اور اس ضمن میں کسی بھی قسم کی انتظامی کوتاہی برداشت نہیں کی جائے گی انہوں نے کہا کہ پولیو پروگرام کی کامیابی کے لیے ضروری ہے کہ اس پروگرام سے متعلق عوامی سطح پر شعور کو اجاگر کیا جائے اس سلسلے میں علماء کرام ذرائع ابلاغ اور سول سوسائٹی کا کردار کلیدی ہے تاکہ اس مرض کا مکمل خاتمہ کیا جا سکے۔
صوبائی وزراء سردار فیصل جمالی ،علی مدد جتک ، سیکرٹری صحت محمد صالح بلوچ ، نیشنل پولیو کوارڈینیٹر کیپٹن ریٹائرڈ محمد انوار الحق، کمشنر کوئٹہ ڈویژن حمزہ شفقات اور کوآرڈینیٹر ایمرجنسی آپریشن سینٹر انعام خان مندوخیل بھی اس موقع پر موجود تھے ۔