لاہور، 3 اگست (اے پی پی): وزیر تعلیم پنجاب رانا سکندر حیات کی زیرِ صدارت اعلیٰ سطحی مشاورتی اجلاس منعقد ہوا جس میں عرصہ 7 سال بعد میٹرک ٹاپرز کی سرکاری سطح پر حوصلہ افزائی کیلئے پروقار تقریب کے انعقاد کا فیصلہ کیاگیا۔ اجلاس میں ڈی سی آفس، ہوم ڈیپارٹمنٹ، آئی جی آفس، پروٹوکول، محکمہ تعلیم سمیت دیگر محکموں کے افسران نے شرکت کی۔
تقریب میں وزیر تعلیم نے مختلف بورڈز کے سیکرٹریز پر مشتمل کوارڈینیشن کمیٹی بنا دی۔ ٹاپرز کے اعزاز میں تقریب 7 اگست کو لاہور میں منعقد کی جائے گی جس میں وزیر اعلیٰ پنجاب مریم نواز مہمان خصوصی ہوں گی۔ رانا سکندر حیات نے اجلاس کو طلباء کے شایان شان تقریب کے انعقاد کی ہدایت دی۔ وزیر تعلیم نے کہا کہ تمام بورڈز کے ٹاپر طلباء کو خصوصی ایوارڈز اور کیش پرائز دئیے جائیں گے، لاہور آمد پر طلبہ کو سرکاری پروٹوکول اور گارڈ آف آنر پیش کیا جائے گا۔
وزیر تعلیم پنجاب رانا سکندر حیات نے ہدایت کی کہ طلبہ کو مکمل پروٹوکول کے ساتھ تقریب کے مقام پر لایا جائے۔ انھوں نے کہا کہ طلبہ کے اعزاز میں تقریب کا انعقاد 7 سال بعد کیا جا رہا ہے، 7 سال قبل آخری مرتبہ شہباز شریف نے طلبہ کی حوصلہ افزائی کیلئے تقریب منعقد کی تھی۔ انہوں نے کہا کہ تحریک انصاف اور نگران حکومت کے ادوار میں کوئی ایسی تقریب منعقد نہ ہو سکی۔ اب 7 سال بعد مریم نواز نے ٹاپر بچوں کے اعزاز میں تقریب کی ہدایت کی ہے۔
وزیر تعلیم نے کہا کہ مریم نواز تعلیم دوست وزیر اعلیٰ ہیں اور تعلیم کے فروغ کا ویژن رکھتی ہیں۔ انہوں نے کہا کہ تقریب میں وزیر اعلیٰ پنجاب کی طرف سے طلبہ کیلئے سکالرشپ کا اعلان بھی متوقع ہے۔ تقریب میں ٹاپر طلباء کے نامزد پسندیدہ استاد کو بھی خصوصی ایوارڈ دیا جائے گا۔
وزیر تعلیم نے کہا کہ پنجاب بھر سے آنے والے ٹاپر طلباء، اساتذہ اور والدین 2 روز لاہور میں قیام کریں گے۔ طلباء کے اعزاز میں شاہی قلعہ میں عشائیہ بھی دیا جائے گا۔ وزیر تعلیم نے اجلاس کو ہدایت دی کہ ٹاپر طلباء کے شایان شان انتظامات میں کوئی کسر نہ چھوڑی جائے۔
