اسلام آباد،02 جولائی(اے پی پی): وزیرداخلہ محسن نقوی نے اسلام آباد کے تھانہ کھنہ کا اچانک دورہ کیا اور تھانے کی حالت زار پر ناراضگی کا اظہار کیا۔
وزیرداخلہ محسن نقوی نے فرنٹ ڈیسک، محررروم اور حوالات کا جائزہ لیا۔ تفتیشی افسران کمرے میں نہیں تھے جبکہ سائلین موجود تھے، اس دوران ڈیوٹی سب انسپکٹر بھی کسی بات کا جواب نہ دے سکے۔
وزیرداخلہ محسن نقوی نے حوالات میں بند ملزمان سے کیسوں کے بارے دریافت کیا اور غلط جگہ ریڑھی لگانے والے 4 افراد کو ضروری قانونی کارروائی مکمل کرکے چھوڑنے کی ہدایت کی۔
تھانے کے اندر 1500 موٹرسائیکلیں اور کئی ضبط شدہ گاڑیاں موجود تھیں، جس پر وزیر داخلہ نے کہا کہ تھانے میں اس قدر زیادہ موٹر سائیکلیں کھڑی کرنے کا کوئی جواز نہیں، موٹر سائیکلیں جن شہریوں کی ہیں انہیں حوالے کی جائیں۔
اس موقع پر وزیرداخلہ محسن نقوی نے سائلین کی بلاتاخیر دادرسی کی ہدایت کی اور کہا کہ سائلین کو بلاوجہ انتظار کرانا کسی صورت برداشت نہیں ہے۔
چیف کمشنر اسلام آباد محمد علی رندھاوا بھی وزیر داخلہ کے ہمراہ تھے۔
