لاہور،6 اگست ( اے پی پی ): وزیر اعلیٰ مریم نواز شریف کی ہدایت پر پنجاب حکومت اور ورلڈ بینک میں اشتراک عمل کی صوبے کی تاریخ کی بڑی مفاہمت ،ورلڈ بینک غربت میں کمی ، معاشی و سماجی ترقی، ماحولیاتی بہتری، سموگ کے خاتمے کے لئے پنجاب حکومت سے پبلک پرائیویٹ پارٹنرشپ پر متفق ۔سینئر صوبائی وزیر مریم اورنگزیب کی صدارت میں منعقدہ اجلاس میں تعلیم ، صحت ، صنعت، زراعت، لوکل گورنمنٹ، آبپاشی کے صوبائی وزرا نے اجلاس میں شرکت کی۔
اجلاس میں پنجاب حکومت کے ورلڈ بینک کے اعلی سطح وفد کے ساتھ ملاقات میں امور طے پاگئے کنٹری ڈائریکٹر ناجے بین ہیسن کی قیادت میں ورلڈ بینک کے وفد نے تعاون کے مختلف شعبوں پر تفصیلی گفتگو کی مختلف امکانات کا جائزہ لیا اور کہا کہ ‘کنٹری فریم ورک’ ورلڈ بینک کا بین الاقوامی پروگرام ہے جس میں شراکت دار ملک یا صوبائی حکومت سے مل کر زراعت، صحت، تعلیم سمیت مختلف شعبوں میں تیز ترین ترقی حاصل کی جاتی ہے ،ورلڈ بینک کے 2024 سے 2027 کے لئے اس خصوصی پروگرام میں شمولیت کا مقصد زراعت، صحت، تعلیم، آئی ٹی، نوجوانوں کے روزگار، ہنرمندی سمیت مجموعی ترقی کے عمل کو تیز بنانا ہے پنجاب میں صحت کی عالمی معیار کی سہولیات کی فراہمی، ماں اور بچوں میں غذائی کمی کے علاج، صحت کا معیار بہتر بنانے کے طریقوں کو عام کرنے، فیملی پلاننگ کی تعلیم اور دیگر شعبوں میں مل کر کام کیا جائے گا ۔
اجلاس سے خطاب کرتے ہوئے صوبائی وزیر مریم اورنگزیب نے کہا کہ وزیر اعلیٰ مریم نواز شریف نے پنجاب کے صحت کے مجموعی نظام میں بہتری کا سب سے بڑا اور پہلا جامع پروگرام شروع کیا، دیہات میں 300 مراکز صحت اور 250 بنیادی مراکز صحت کو عالمی معیار کے مطابق بنایا جا رہا ہے،گاؤں ہو یا شہر، ہر سرکاری علاج گاہ پر ڈاکٹر، دوائی، طبی عملے اور مشینری کی فراہمی یقینی بنائیں گے۔
انہوں نے کہا کہ پنجاب کے لاکھوں نوجوانوں کو آئی ٹی میں عالمی معیار کی تربیت دینے، ہنرمند بنانے کے پروگرام پر تیزی سے عمل جاری ہے،دیہات اور شہروں کی مساوی ترقی کے لئے گورننس سمیت مختلف شعبوں میں نمایاں اور واضح بہتری وزیر اعلی کا اولین ہدف ہے۔ نوجوانوں کو لیپ ٹاپ دے کر ان کی زندگیوں میں آئی ٹی کا انقلاب، تعلیم روزگار کے دروازے کھول رہے ہیں۔
انہوں نے کہا کہ کسان کارڈ سے زراعت اور کسان کو مڈل مین کے استحصال سے نجات دلائی ہے، زرعی ٹیوب ویلز کی سولر پر منتقلی کے پروگرام پر عمل درامد جاری ہے۔انہوں نے کہا کہ وزیر اعلیٰ پانچ سال میں پنجاب کے عوام کو صحت مند، نوجوانوں کو تعلیم یافتہ، ہنرمند، صوبے کی معاشی حالت اور ماحول کو تندرست بنانے کے اہداف کے جامع منصوبے پر پوری محنت سے عملدرآمد کرا رہی ہیں،چیف منسٹر گرین کریڈٹ پروگرام کا اجرا اسی سلسلے کی کڑی ہے۔ عالمی بینک کے وفد نے وزیر اعلیٰ مریم نواز شریف کے معاشی، سماجی اور معاشی ترقی کے جامع وژن کی تعریف اور بھرپور تعاون کی یقین دھانی کروائی اور کہا کہ پاکستان کے ساتھ مضبوط، دیرپا اور جامع اشتراک عمل کے خواہاں ہیں، عام آدمی کے مسائل کے حل کے لیے مل کر کوشش کرنا ہی درست حکمت عملی ہے، پی اینڈ ڈی کمپلیکس میں منعقدہ اجلاس میں متعلقہ وزارتوں کے سیکرٹریز کے علاوہ اعلیٰ صوبائی حکام شریک تھے۔
