اسلام آباد،7اگست(اے پی پی ):وفاقی وزیرداخلہ محسن نقوی سے عراق کے سفیر حامد عباس لفتہ نے اہم ملاقات کی۔ملاقات میں پاکستانی زائرین کو ہر ممکن سہولیات فراہم کرنے سمیت باہمی دلچسپی کے امور پر گفتگو کی گئی ۔
ملاقات میں پاکستانی زائرین کے حوالے سے کئی فیصلے کیے گئے،اربعین کے موقع پر پاکستانی زائرین کے کوٹہ میں اضافہ کیا جائے گا اور رواں سال گزشتہ برس سے زیادہ ویزے جاری کئے جائیں گے۔ملاقات میں اربعین کے موقع پر زائرین کی سہولت کیلئے سپیشل پروازیں شروع کرنے پر بھی اتفاق کیا گیا۔
زائرین کی مزید سہولت کیلئے کراچی میں عراقی قونصلیٹ کو دوبارہ اوپن کرنے کے لئےآج ہی تمام معاملات حل کر لئے جائیں گے۔ وزیر داخلہ محسن نقوی نے کہا کہ وزارت داخلہ اس ضمن میں ممکن تعاون فراہم کرے گی۔
اربعین کے موقع پر پاکستانی زائرین کیلئے ویزا فیس ختم کرنے کیلئے وزیر داخلہ اپنے عراقی ہم منصب سے ٹیلی فون پر رابطہ کریں گے۔
ملاقات میں عراق میں قید پاکستانیوں کی وطن واپسی سے متعلق بھی گفتگو کی گئی۔ وزیر داخلہ محسن نقوی نے کہا کہ اس ضمن میں عراق میں پولیس لائنزن آفیسر تعینات کیا جائے گا۔انہوں نے کہا کہ زائرین سے زائد فیس چارج کرنے والے ایجنٹوں کے خلاف بھر پور ایکشن لیا جائے گا۔ملاقات میں ڈپلومیٹک اور آفیشل پاسپورٹ پر ویزا کی چھوٹ کے معاہدہ کو جلد از جلد حتمی شکل دینے پر اتفاق کیا گیا۔وزیرداخلہ محسن نقوی نے زائرین کی سہولت کے لئے اقدامات پر عراقی وزیر داخلہ اور عراقی سفیر کا شکریہ ادا کیا۔انہوں نے کہا کہ ہوائی سفر سے عراق جانے والے زائرین سے پاسپورٹ نہ لینے کے فیصلے سے بہت سہولت ملے گی۔
عراق کے سفیر حامد عباس نے کہا کہ پاکستانی زائرین کو دیگر ممالک کے مساوی سہولیات کی فراہمی یقینی بنائی جائے گی۔عراقی سفیر نے عراقی وزیر داخلہ کی جانب سے وزیر داخلہ محسن نقوی کو عراق دورے کا دعوت نامہ بھی پیش کیا۔ملاقات میں سیکرٹری داخلہ خرم علی آغا اور ایڈیشنل سیکرٹری رفعت مختار راجہ بھی موجود تھے۔
ملاقات کے بعد وفاقی وزیرداخلہ محسن نقوی نے فوری طور پر وفاقی وزیر ایوی ایشن خواجہ محمد آصف سے رابطہ کیا، جس دوران عراقی ائیر لائن کو آج سے ہی خصوصی پروازیں چلانے کی اجازت دینے پر اتفاق کیا گیا۔
