اسلام آباد، 01 اگست ( اے پی پی):وفاقی وزیرداخلہ محسن نقوی نے اسلام آباد کے ترقیاتی منصوبوں کے رات بھر دورے کیے اور کام کے معیار کا جائزہ لیا اور منصوبوں کو جلد مکمل کرنے کی ہدایت کی۔
ا وفاقی وزیرداخلہ نے اسلام آباد ایکسپریس وے،پارک روڈ پراجیکٹس اورجناح کنونشن سنٹر کی اپ گریڈیشن پر کام کی رفتار کا جائزہ لیااور کام کا مشاہدہ کیا اور انہوں نے بھنڈر پل پر جاری تعمیراتی کاموں کا معائنہ کیا اور پی ڈبلیو ڈی چوک سے ٹی چوک تک ایکسپریس وے پراجیکٹ کو 2 ماہ میں 100 فیصد مکمل کرنے کی ہدایت بھی کی۔
وزیرداخلہ محسن نقوی نے ایکسپریس وے پراجیکٹ کو کنٹرولڈ کوریڈور بنانے کا پلان طلب کیا، ایف ڈبلیو او کے حکام نے منصوبے پر ہونے والی پیش رفت پر بریفنگ دی۔انہوں نے ایف ڈبلیو او کے کیمپ آفس کے لان میں شجرکاری مہم کے تحت پودا لگایا۔
وزیرداخلہ نے پارک روڈ کی تعمیر و گشادگی کے پراجیکٹ کا بھی جائزہ لیا اور منصوبے کو ستمبر سےقبل مکمل کرنے کی ہدایت کی ۔انہوں نے کام کے دوران ٹریفک کی دیگر روٹس پر منتقلی کا پلان طلب کیا اور ڈی آئی جی آپریشنز اور ایس ایس پی ٹریفک کو منصوبے کا دورہ کرکے قابل عمل پلان وضع کرنے کی ہدایت کی۔
وزیرداخلہ نے جناح کنونشن سنٹر میں جاری اپ گریڈیشن کے کام کا معائنہ کیا اور جناح کنونشن سنٹر کے مختلف شعبوں کا دورہ کیا اور اپ گریڈیشن پراجیکٹ کو جلد اور اعلیٰ معیار کے ساتھ مکمل کرنے کی ہدایت کی۔
چیف کمشنر اسلام آباد و چیئرمین سی ڈی اے محمد علی رندھاوا نے وفاقی وزیرداخلہ محسن نقوی کو منصوبے پر بریفنگ دی۔
