اسلام آباد،8اگست (اے پی پی):وفاقی وزیر انجینئر امیر مقام سے پاکستان میں امریکہ کے سفیر ڈونلڈ ارمین بلوم نے جمعرات کو یہاں ملاقات کی ،ملاقات میں افغان مہاجرین کی بہبود، بحالی، دوطرفہ تعاون سے متعلق امور زیر بحث آئے۔
وفاقی وزیر نے پاکستان کے ساتھ امریکہ کے دیرینہ تعاون پر اظہار تشکر کیا اور پاکستان پر دہشت گردی کے شدید اثرات کو اجاگر کرتے ہوئے انسانی جانوں اور معاشی نقصانات کے حوالے سے بے پناہ قربانیوں کا ذکر کیا۔ انجینئر امیر مقام نے کہا کہ 2001 سے پاکستان میں دہشت گردی کی وجہ سے 70,000 سے زائد جانیں ضائع ہوئیں اور 150 بلین ڈالر سے زیادہ کا معاشی نقصان ہوا۔
وفاقی وزیر انجینئر امیر مقام نے عالمی برادری پر زور دیا کہ وہ دہشت گردی کے خلاف جنگ میں پاکستان کی کوششوں کو تسلیم کرے۔انہوں نے افغان مہاجرین کی واپسی میں امریکہ اور دیگر عالمی شراکت داروں کی مدد کی ضرورت پر زور دیا۔
امریکی سفیر ڈونلڈ بلوم نے پاکستان کی اقتصادی ترقی بالخصوص ٹیکسٹائل جیسی برآمدات کو بہتر بنانے میں تعاون کے امریکی عزم کا اعادہ کیا۔ انہوں نے پاکستان خاص طور پر خیبر پختونخواہ اور بلوچستان میں دہشت گردی کے شدید اثرات کا اعتراف کیا اور افغان شہریوں کی میزبانی کی حمایت میں پاکستان کے کردار کو سراہا۔
