اسلام آباد،5اگست (اے پی پی):اراکین پارلیمنٹ کے وفد نے فلسطین کے سابق وزیراعظم اسماعیل ہانیہ کی شہادت پر قومی اسمبلی سے منظور ہونے والی متفقہ مذمتی قرارداد پاکستان میں اقوام متحدہ کے نمائندے کو پیش کی۔
پیر کو ڈپٹی سپیکر قومی اسمبلی سید غلام مصطفی شاہ کی قیادت میں اراکین قومی اسمبلی کے وفد نے اقوام متحدہ کے ریذیڈنٹ اور انسانی حقوق کے کوآرڈینیٹر کے دفتر کا دورہ کیا۔ وفد میں وفاقی وزیر اعظم نذیر تارڑ، اراکین قومی اسمبلی ڈاکٹر طارق فضل چوہدری، مولانا عبدالغفور حیدری، سید امین الحق، انجم عقیل خان، خالد حسین مگسی، رانا قاسم نون، ڈاکٹر نفیسہ شاہ اور شازیہ مری سمیت دیگر ارکان قومی اسمبلی بھی شامل تھے۔
وفد نے اقوام متحدہ کے ریذیڈنٹ اور انسانی حقوق کے کوآرڈینیٹر کو فلسطین پر قومی اسمبلی سے منظور ہونے والی متفقہ قرارداد پیش کی۔ واضح رہے کہ قومی اسمبلی نے 2 اگست کو اسماعیل ہانیہ کی شہادت پر متفقہ قرارداد منظور کی تھی۔
اس موقع پر ڈپٹی سپیکر قومی اسمبلی نے کہا کہ اسماعیل ہانیہ کے قتل سے خطے کے عوام کے غم و غصے میں اضافہ ہوا ہے، اسرائیل کی جانب سے فلسطینیوں پر مظالم بڑھ گئے ہیں۔ انہوں نے کہا کہ اب تک فلسطین میں 40 ہزار سے زیادہ بے گناہ خواتین اور بچوں سمیت فلسطینی شہید ہو چکے ہیں۔
اس موقع پر اقوام متحدہ کے نمائندے کو بتایا گیا کہ قرارداد میں غزہ میں فوری جنگ بندی اور مظلوم فلسطینیوں کو بلاروک ٹوک مدد فراہم کرنے کا مطالبہ کیا گیا ہے اور یہ بھی مطالبہ کیا گیا ہے کہ قابض اسرائیلی افواج کے فلسطین سے فوری انخلاء کو بھی جلدازجلد یقینی بنایا جائے۔
وفد نے بتایا کہ قومی اسمبلی سے منظور ہونے والی متفقہ قرارداد میں فلسطینیوں سے مکمل یکجہتی کا اظہار کیا گیا ہے۔
