اسلام آباد، یکم اگست (اے پی پی ): وفاقی وزیرخزانہ ومحصولات سینیٹرمحمداورنگزیب نے پاکستان اورایتھوپیا کے درمیان دوطرفہ تعلقات کو فروغ دینے کے عزم کااعادہ کرتے ہوئے کہاہے کہ دونوں ممالک باہمی شراکت داری کے ذریعہ دوطرفہ تعلقات کے فوائد سے مستفیدہوسکتے ہیں۔
ان خیالات کا ا ظہار انہوں نے ایتھوپیا کے سفیر جمال بیکر عبد اللہ سے گفتگو میں کیا، جنہوں نے جمعرات کو یہاں ان سے ملاقات کی ،ملاقات میں دونوں ممالک کے مابین دوطرفہ تعلقات کو فروغ دینے کے عزم کااعادہ کیا گیا اور کہا گیا کہ دونوں ممالک باہمی شراکت داری کے ذریعہ دوطرفہ تعلقات کے فوائد سے مستفیدہوسکتے ہیں۔
وزیر خزانہ نے سفیرکو پاکستان میں جاری اقتصادی اصلاحات کے عمل سے آگاہ کیا اوربتایا کہ یہ اصلاحات ایک وسیع تر ملکی ایجنڈے کا حصہ ہیں جس کا مقصد معاشی استحکام حاصل کرنا ہے۔ انہوں نے زرمبادلہ کے ذخائر میں بہتری، سرکاری اداوں میں اصلاحات، اور توانائی کے شعبہ میں پیش رفت سمیت معیشت کے کلیدی اشاریوں میں بہتری پرروشنی ڈالی۔
وفاقی وزیرخزانہ ومحصولات سینیٹرمحمداورنگزیب نے کہاکہ بین الاقوامی ریٹنگ ایجنسیوں نے حکومت کے معاشی فیصلوں کے نتیجے میں معاشی استحکام کی تائید کی ہے ، ملک کے معاشی منظرنامہ میں بہتری آئی ہے اور فچ کی رپورٹ سے اس کی تصدیق کی گئی ہے، حکومت اب معاشی استحکام حاصل کرنا چاہتی ہے۔
ایتھوپیا کے سفیر عبد اللہ نے پاکستان میں معاشی استحکام کی تعریف کی اور اسے سراہا ۔ انہوں نے ایتھوپیا کے ملکی اقتصادی اصلاحات کے لیے اسی طرح کے نقطہ نظر اپنانے کے حوالہ سے اپنے خیالات پیش کئے ۔ انہوں نے پاکستان کے تجربے سے متاثر ہوکر ایتھوپیا کی حکومت کے اقدامات خاص طور پر کرنسی کو مستحکم کرنے اور معاشی لچک کو فروغ دینے کے بارے میں تفصیل سے بتایا۔فریقین نے باہمی خوشحالی کو فروغ دینے کے لیے دو طرفہ تجارت اور مالی تعاون کو بڑھانے کے امکانات کابھی جائزہ لیا ۔
سفیر عبد اللہ نے تعلیمی شعبہ میں تعاون خاص طور پر طلباءکے تبادلے اور اسکالرشپ پروگراموں کو فروغ دینے کی ضرورت پرزوردیا۔وزیرخزانہ نے نے دونوں ممالک کے درمیان تعلقات کو فروغ دینے کی اہمیت پر اتفاق اور مجوزہ تعاون کا خیرمقدم کیا۔ فریقین نے باہمی شراکت داری سے حاصل ہونے والے فوائد سے اتفاق کیا اور دوطرفہ تعلقات کو مزید مضبوط بنانے کے عزم کا اظہار کیا۔
