اسلام آباد ،06 اگست (اے پی پی ): وفاقی وزیر رانا تنویر حسین نے کہا ہے کہ پاکستان اور جمہوریہ کوریا کے تاریخی اور برادرانہ تعلقات ہیں اور دونوں ممالک زرعی ٹیکنالوجی کی منتقلی کے منصوبوں پر مشترکہ طور پر کام کر رہے ہیں۔
ان خیالات کا اظہارانہوں نے منگل کو یہاں کوریا پروگرام برائے بین الاقوامی زراعت کے وفد سے ملاقات میں کیا،جس کی قیادت پاکستان میں جمہوریہ کوریا کے سفیر پارک کی جون نے کی۔
وفاقی وزیر نے کہا کہ سیڈ پوٹو کمپلیکس کا افتتاح بدھ کو پاکستان ایگریکلچرل ریسرچ کونسل میں ہو گا اس اقدام سے بیج کے معیار کو بہتر بنانے، دو طرفہ تعاون کے فروغ ،ملک میں زرعی پیداوار کو بڑھانے اور ترقی کو فروغ دینے کے لیے اہم قدم ثابت ہوگا۔
انہوں نے کہا کہ ایروپونکس کے ذریعے آلو کے بیج کی پیداوار پر جدید تحقیق ہو سکے گی، یہ منصوبہ پاکستان کو جدید کوریائی ایروپونک نظام کی منتقلی میں سہولت فراہم کرے گا۔ اس کے علاوہ یہ پراجیکٹ غذائی تحفظ کے چیلنجوں سے نمٹنے اور پائیدار زراعت کو فروغ دے گا۔
اس موقع پر کوریا کے سفیر پارک کی جون کا کہنا تھا کہ پاکستان کے ساتھ زرعی شعبے میں تعاون جاری ہے، زرعی ٹیکنالوجی کی منتقلی میں مدد فراہم کر رہے ہیں۔انہوں نے کہا کہ کوریا پاکستان کو جدید زرعی ٹیکنالوجی کے استعمال کی ضروری تربیت بھی فراہم کرے گا۔
