اسلام آباد،یکم اگست(اے پی پی ): وفاقی وزیر صنعت و پیداوار جام کمال خان نے کہا ہے کہ پاکستان اور سوئٹزرلینڈ کے درمیان قریبی دوستانہ تعلقات قائم ہیں، سوئٹزرلینڈ کی کمپنیوں نے پاکستان میں تجارت اور سرمایہ کاری میں اہم کردار ادا کیا ہے۔
ان خیالات کا ا ظہار وفاقی وزیر صنعت و پیداوار جام کمال خان نے جمعرات کو یہاں سوئٹزرلینڈکے 733 ویں یوم آزادی کے حوالے سے پاکستان میں سوئٹزرلینڈکے سفیر جارج سٹینر کی جانب سے منعقدہ استقبالیہ تقریب سے خطاب میں کیا۔اس موقع پر وزیر دفاع خواجہ محمد آصف بھی موجود تھے۔ وفاقی وزیر جام کمال خان نے حکومت اور پاکستان کے عوام کی جانب سے سوئٹزرلینڈ کے عوام کو یوم آزادی پر مبارکباد دی۔
سوئٹزرلینڈکے سفیر نے سوئٹزرلینڈ کے یوم آزادی کی تقریب میں شرکت پر حاضرین کا شکریہ ادا کیا۔انہوں نے کہا کہ پاکستان اور سوئٹزرلینڈ کے درمیان سفارتی تعلقات کے 75 سال مکمل ہوگئے ہیں۔
سفیر نے کہا کہ پاکستان اور سوئٹزرلینڈ آئندہ بھی مختلف شعبہ جات میں ملکر کام کریں گے۔ انہوں نے کہا کہ پاکستان میں متعدد سوئس کمپنیاں کام کررہی ہیں اور دونوں ممالک کے درمیان تجارتی تعلقات میں اضافہ ہورہا ہے۔
قبل ازیں تقریب کے آغاز میں دونوں ملکوں کے قومی ترانوں کی دھنیں بجائی گئیں جبکہ سوئٹزرلینڈ کے سفیر جارج سٹینر نے دیگر معزز مہمانوں کے ہمراہ سوئٹزرلینڈکے یوم آزادی کی مناسبت سے کیک کاٹا۔
