اسلام آباد،07 اگست (اے پی پی ): وفاقی وزیر برائے امور کشمیر و گلگت بلتستان و سیفران انجینئر امیر مقام نے کہا ہے کہ گلگت بلتستان کے مسائل وفاقی حکومت کی ترجیحات میں شامل ہیں، خطے کی ترقی اور خوشحالی کے لیے اپنے اختیارات کو بروئے کار لائیں گے۔
ان خیالات کا اظہارانہوں نے بدھ کو یہاں گلگت بلتستان کونسل میں اعلیٰ سطحی اجلاس کی صدارت کرتے ہوئے کیا۔انہوں نے کہ گلگت بلتستان میں دنیا کا اعلیٰ سیاحتی مقام بننے کی بے پناہ صلاحیت موجود ہے۔
انہوں نے کہا کہ خطے کی معدنیات اور گلگت بلتستان کی ہائیڈل دولت پر بھی روشنی ڈالی اور اسے ترقی کے لیے بروئے کار لانے کی کوششوں کا عہد کیا۔
امیر مقام نے کہا کہ گلگت بلتستان کی خصوصی حیثیت کو مدنظر رکھتے ہوئے گلگت بلتستان کے تاجروں کے مسائل کو قواعد و ضوابط کے مطابق خوش اسلوبی سے حل کیا جائے گا اور تمام اسٹیک ہولڈرز کو اعتماد میں لیا جائے گا۔
انہوں نے کہا کہ وفاقی حکومت گلگت بلتستان کے عوام کو زیادہ سے زیادہ ریلیف فراہم کرے گی۔ انہوں نے کہا کہ حکومت نے گلگت بلتستان کو گندم کی فراہمی کا مسئلہ حل کر لیا ہے۔
