سکھر،01اگست(اے پی پی): ڈپٹی کمشنر ڈاکٹر ایم بی راجہ دھاریجو نے کہا ہے کہ پورے ملک کی طرح ضلع سکھر میں بھی پاکستان کا یوم آزادی 14 اگست پورے قومی جوش و جذبے کے ساتھ منایا جائے گا۔
ان خیالات کا اظہار انہوں نے سکھر میں 14 اگست کو یوم آزادی کی تقریبات کے انتظامات کے حوالے سے منعقدہ اجلاس کی صدارت کرتے ہوئے کیا،اجلاس میں ایڈیشنل کمشنر- ٹو سکھر بشریٰ منصور، میونسپل کارپوریشن، تعلیم، صحت، پولیس، سیپکو اور دیگر متعلقہ محکموں کے افسران نے شرکت کی۔
ڈپٹی کمشنر سکھر ڈاکٹر ایم بی راجہ دھاریجو نے بتایا کہ یوم آزادی کی تقریب کے مہمان خصوصی سندھ حکومت کے ترجمان/ میئر سکھر بیرسٹر ارسلان اسلام شیخ، چیئرمین ضلع کونسل سکھر سید کمیل حیدر شاہ اور کمشنر سکھر ڈویڑن فیاض حسین عباسی ہوں گے، تقریب میں ڈی ائی جی سکھر پیر محمد شاہ اور ایس ایس پی سکھر بھی شرکت کریں گے۔
ڈپٹی کمشنر نے متعلقہ حکام کو ہدایت کی کہ یوم آزادی کا پروگرام ایک قومی مقصد ہے جس میں سکول، کالج کے طلباء، طالبات، سویٹ ہوم کے بچوں اور عملے کے علاوہ ضلع کے تمام متعلقہ سرکاری محکموں کے ملازمین کی شرکت یقینی بنائی جائے۔
انہوں نے میونسپل کارپوریشن کے افسران کو ہدایت کی کہ گرمی سے بچاؤ کے لیے سایہ دار جگہ پر تقریب کے انعقاد، پینے کے صاف اور ٹھنڈے پانی کے علاوہ مرکزی تقریب کی جگہ پر 20 سے 25 جمبو پنکھوں کا بھی انتظام کیا جائے۔ انہوں نے کہا کہ شہر کی مختلف سڑکوں کے علاوہ بالخصوص بندر روڈ کو جھنڈیوں اور رنگ برنگے بینرز سے سجایا جائے۔
ڈپٹی کمشنر نے ہدایت کی کہ میونسپل گراؤنڈ میں استقبالیہ ایریا پر سینکڑوں کی تعداد میں بیجز موجود رکھے جائیں اور تقریب شرکت کرنے والے ہر اک فرد کو بیج دیا جانا چاہئے۔ انہوں نے سیپکو حکام کو سختی سے ہدایت کی کہ 14 اگست کو لوڈ شیڈنگ سے مکمل اجتناب کیا جائے۔
ڈپٹی کمشنر نے ڈسٹرکٹ ہیلتھ آفیسر کو سول اسپتال سکھر، ایس آئی یو ٹی، چلڈرن اسپتال اور این آئی سی وی ڈی سکھر کے مریضوں میں مٹھائی تقسیم کرنے کی ہدایت بھی کی۔
