اسلام آباد، 05 اگست (اے پی پی):05اگست 2019 کشمیر کی تاریخ کا سیاہ ترین دن ہے جب بھارتی حکومت نے کشمیر کو ہڑپ کرنے کیلئے ایک چال چلی اور پانچ سال قبل آئین کےآرٹیکل 370 اور 35A کو منسوخ کیااور مقبوضہ کشمیر کی نیم خودمختار حیثیت کو ختم کرکے اس کے گرد عسکری محاصرہ سخت کردیا۔
بھارت مقبوضہ کشمیر کے کروڑوں مسلمانوں کی شناخت ختم کرکے اس کو ہندوستان کا حصہ بنانے کا خواہاں ہے ،بھارتی اقدامات نے کشمیر کو ایک عقوبت خانے میں تبدیل کردیااور دہائیوں سے بھارتی استحصال کے شکار کشمیر کے عوام پر ظلم و ستم کا ایک نیا باب شروع ہو گیا۔ بھارت نے 5 اگست کو کشمیر میں کرفیو اور لاک ڈاؤن نافذکرتے ہوئے کشمیریوں کا استحصال شرو ع کردیا،یہ ظالمانہ اقدام اقوام متحدہ کے بنیادی حقوق کے عالمی چارٹر کی بھی خلاف ورزی ہے،یہ دن اقوام عالم کےلیے یاد دہانی ہے کہ آج بھی کشمیر کو آزادی میسر نہیں،آج بھی کشمیر کی دھرتی شہداء کے خون سے لال ہو رہی ہے،لیکن تمام تر بربریت کے باوجود کشمیری اپنے حق خودارادیت کی جنگ جاری رکھے ہوئے ہیں اور پرعزم ہیں کہ کشمیر کی آزادی تک یہ جدوجہد جاری رہےگی۔
