اسلام آباد، 5 اگست (اے پی پی): وفاقی وزیر امور کشمیر و گلگت بلتستان انجینئر امیر مقام نے کہا ہے کہ یوم استحصال کشمیر کے موقع پر ہم جموں وکشمیر کے عوام کی جرات اور بہادری کو سلام پیش کرتے ہیں جنہوں نے اپنے بنیادی حقوق کے حصول کی جدوجہد میں لازوال قربانیاں دی ہیں۔
یوم استحصال کشمیر پر اپنے پیغام میںوفاقی وزیر امور کشمیر و گلگت بلتستان انجینئر امیر مقام نے کہا کہ بھارت کے غیر قانونی زیر قبضہ جموں وکشمیر کی خصوصی حیثیت کے خاتمے کے بھارت کے 5 اگست 2019 کے یکطرفہ اقدام کے 5 سال مکمل ہو گئے ہیں ، اس دن بھارت نے جموں وکشمیر کی خصوصی حیثیت ختم کرتے ہوئے اسے دو یونین ٹریٹریز میں تقسیم کر کے اس کی عالمی تسلیم شدہ متنازعہ حیثیت کو تبدیل کرنے کا مذموم قدم اٹھایا، بھارت کے ان اقدامات کا مقصد خطے کی آبادی کے خدوخال میں تبدیلی لانا تھا جس کے نتیجے میں کشمیریوں کو اپنے ہی وطن میں اقلیت بنا کر انہیں بے اختیار بنانا مقصود تھا۔
وفاقی وزیر امور کشمیر و گلگت بلتستان انجینئر امیر مقام نے کہا کہ بھارت نے 5 اگست 2019 کے اقدام کے بعد غیر قانونی زیر قبضہ جموں وکشمیر میں اپنے ظلم وبربریت میں مسلسل اضافہ کیا ہے، میڈیا کی آواز دبانے کی کوششیں کی جارہی ہیں، کشمیری عوام کی حقیقی قیادت کو پابند سلاسل کیا گیا ہے ، ایک معروف کشمیری حریت رہنما یاسین ملک کو سزائے موت دلوانے کےلئے قابض حکام سرگرم ہیں، بے گناہ کشمیریوں کو حراساں کرنا ، انہیں غیر قانونی حراست میں رکھنا، بستیوں کے محاصرے اور گھروں کی تلاشی اور ماورائے عدالت قتل معمول بن چکا ہے۔انہوں نے کہا کہ کشمیری عوام اظہار رائے کی آزادی اور عوامی اجتماعات کے حق سے محروم ہیں، سب سے اہم بات یہ ہے کہ وہ اپنے عالمی سطح پر تسلیم شدہ ناقابل تنسیخ حق خودارادیت کے حصول سے بھی قاصر ہیں۔
وفاقی وزیر امور کشمیر و گلگت بلتستان انجینئر امیر مقام نے کہا کہبین الاقوامی برادری کو بھارت کے غیر قانونی زیر قبضہ جموں وکشمیر میں انسانی حقوق کی سنگین اور وسیع پیمانے پر خلاف ورزیوں کے خاتمے ، 5 اگست 2019 کے یکطرفہ اور غیر قانونی اقدام کو واپس لینے ، ریاست میں رائج کالے قوانین کے خاتمے ، سیاسی قیدیوں کی رہائی اور جموں وکشمیر کے تنازعے کے حل سے متعلق اقوام متحدہ کی سلامتی کونسل کی قراردادوں پر عمل درآمد کے لئے اپنا کردار ادا کرنا چاہئے۔
انہوں نے کہا کہ پاکستان اقوام متحدہ کی سلامتی کونسل کی قراردادوں کے مطابق کشمیریوں کو ان کے بنیادی حق خودارادیت کے حصول کےلئے اپنا کردار ادا کرتا رہے گا اور کشمیری عوام کے حق خودارادیت کے حصول تک ان کی جدوجہد کی بھرپور اخلاقی، سیاسی اور سفارتی حمایت جاری رکھے گا۔
