اسلام آباد، 29 جنوری (اے پی پی): آئی سی سی چیمپئنز ٹرافی ٹورنامنٹ۔ راولپنڈی کرکٹ سٹیڈیم مین پویلین اور میڈیا باکسز کی اپ گریڈیشن کا کام جاری ہے۔انکلوژرز میں کرسیوں کی تنصیب کا کام آخری مرحلے میں داخل ہوچکا ہے۔
چیئرمین پاکستان کرکٹ بورڈ محسن نقوی نے راولپنڈی کرکٹ سٹیڈیم کا دورہ کیا اور اپ گریڈیشن پراجیکٹ پر پیش رفت کا جائزہ لیا۔محسن نقوی نے پویلین، میڈیا باکس، وی آئی پی باکسز سمیت سٹیڈیم کے مختلف حصوں کا معائنہ اور فنشنگ ورک کا مشاہدہ کیا۔
چیئرمین پی سی بی محسن نقوی نے اپ گریڈیشن پراجیکٹ پر پیش رفت پر اطمینان کا اظہار کیا۔ انہوں نے کہا کہ طویل عرصے بعد پاکستان میں آئی سی سی ٹورنامنٹ کا انعقاد ہو رہا ہے، میگا ایونٹ کے شاندار انعقاد کے لیے تمام تیاریاں مکمل ہیں۔ مل کر چیمپئنز ٹرافی ایونٹ کو یادگار بنائیں گے۔
انہوں نے کہا کہ امید ہے شائقین کرکٹ کو بہترین کرکٹ دیکھنے کو ملے گی۔
19 فروری سے شروع ہونے والی چیمپئنز ٹرافی میں راولپنڈی سٹیڈیم میں 3 میچ کھیلے جائیں گے جبکہ 24 فروری کو بنگلہ دیش کا نیوزی لینڈ، 25 فروری کو آسٹریلیا کا جنوبی افریقہ اور 27 فروری کو پاکستان کا مقابلہ بنگلہ دیش سے ہوگا۔
