اسلام آباد،19 جنوری(اے پی پی):چیئرمین سینیٹ سید یوسف رضا گیلانی نے کہا ہے کہ تعلیم، اختراع اور قومی ترقی وقت کی اہم ضرورت ہے،نوجوانوں کو جدید چیلنجز کے لیے تیار کرنا ناگزیر ہے،ڈیجیٹل، سماجی اور جذباتی مہارتیں روزگار کے لیے اہم ہیں۔
ان خیالات کا اظہار چیئرمین سینیٹ سید یوسف رضا گیلانی نے اتوار کو یہاں اقراء یونیورسٹی کے 25 ویں کانووکیشن کی تقریب سے خطاب کے دوران کیا۔
چیئرمین سینیٹ نے اپنے خطاب میں کہا کہ عالمی منظرنامے کے مطابق طلبہ کو تیار کرنا ضروری ہے،پاکستان کی علمی معیشت کی طرف منتقلی نوجوانوں کے لیے مواقع پیدا کرے گی۔انہوں نے مزید کہا کہ تعلیمی ادارے تنقیدی سوچ اور قیادت کو فروغ دیں۔
چیئرمین سینیٹ نے کہا کہ معلومات اور بصیرت جدید دور میں ترقی کا اصل سرمایہ ہیں۔انہوں نے کہا کہ پیپلز پارٹی نے بھارت میں مقیم مسلمانوں کے سکولز اور کالجوں میں داخلے کروائے جبکہ بہاوالدین زکریا یونیورسٹی ملتان کے طلبا کے دیگر ممالک کی یونیورسٹیوں میں بھی داخلے کرائے ہیں ۔ انہوں نے کہا کہ بہاوالدین زکریا یونیورسٹی میں تعلیم کے معیار کو بھی بہتر بنایا گیا ہے۔
