اسلام آباد، 20 جنوری (اے پی پی):وزیراعظم محمد شہباز شریف نے حج 2025 کی تیاریوں کے سلسلہ میں جائزہ اجلاس کی صدارت کرتےہوئے کہا کہ حجاج کرام کو ہرقسم کی معاونت اور سہولت کی فراہمی یقینی بنائی جائے۔
انہوں نے کہا کہ حج 2025 کی تیاری میں کسی قسم کی لاپرواہی برداشت نہیں کی جائے گی، حجاج کرام کے لئے معاونین کے انتخاب کے طریقہ کار میں شفافیت اور میرٹ کو ملحوظ خاطر رکھا جائے۔
اجلاس میں وفاقی وزراء احد خان چیمہ، چوہدری سالک حسین اور متعلقہ اعلیٰ حکام نے شرکت کی۔اجلاس میں وزیرِ اعظم کو حج 2025 کی تیاریوں پر تفصیلی بریفنگ دی گئی۔اجلاس کو بتایا گیا کہ گزشتہ برس کی طرح اس سال بھی حجاج کرام کو سمز کی فراہمی پاکستان سے کی جائے گی اور حجاج کی معاونت کے لئے حج موبائل ایپلی کیشن بھی فعال ہے۔ اجلاس کو حج فنڈ پر پیش رفت سےآگاہ کرتے ہوئے بتایا گیا کہ اس پر کام حتمی مراحل میں ہے۔
اجلاس میں حج 2025 کی تیاریوں کے حوالے سے ایک جامع بریفنگ تیار کرکے آئندہ چند روز میں پیش کی جائے۔
وزیرِ اعظم نے حج ڈیوٹی پر اچھی شہرت کے قابل افسران تعینات کرنے کی ہدایت کی۔
وزیراعظم نے ہدایت کی کہ حجاج کرام کی رہائش، سفری و دیگر سہولیات کا خاص خیال رکھا جائے۔حجاج کرام کے لئےمعاونین کے انتخاب کے طریقہ کار میں شفافیت اور میرٹ کو ملحوظِ خاطر رکھا جائے۔
