واشنگٹن، 23 جنوری(اے پی پی):وفاقی وزیرداخلہ محسن نقوی نے امریکی کانگریس مین جوولسن اور کانگریس مین روب بریسنہان سے الگ الگ ملاقات کی۔ ان کے مابین باہمی دلچسپی کے امور اور پاک امریکہ تعلقات کے فروغ کے حوالے سے تبادلہ خیال کیا گیا۔انہوں نے علاقے میں پائیدار امن کے قیام خصوصا افغانستان کی صورتحال پر بھی گفتگو کی۔
ملاقاتوں میں پاک امریکہ تعلقات کو مزید فروغ کےعزم کا اظہار کیا گیا اوردونوں ممالک کے درمیان تجارتی و ثقافتی وفود کے باہمی تبادلے بڑھانے کی ضرورت پر بھی زور دیا گیا۔
وزیر داخلہ محسن نقوی نےپاک امریکہ تعلقات کے فروغ کے لئے ہر سطح پر مکمل تعاون کی یقین دہانی کرائی۔
وزیر داخلہ نے کانگریس مین جو ولسن اور کانگریس مین روب بریسنہان کو پاکستان کے دورے کی دعوت دی۔
وفاقی وزیر داخلہ محسن نقوی کا کہنا تھا کہ امریکہ پاکستان کا انتہائی اہم سٹریٹجک پارنٹر ہے،پاکستان اور امریکہ کے تعلقات کئی دہائیوں پر محیط ہیں۔ انہوں نے کہا کہ صدر ڈونلڈ ٹرمپ کا خطاب یقینا عالمی امن اور تنازعات کے حل میں انتہائی حوصلہ افزا ہے۔ صدر ڈونلڈ ٹرمپ کے دور میں پاک امریکہ تعلقات کو نئی جہت ملے گی۔ صدر ڈونلڈ ٹرمپ دنیا کے لئے امن کی امید بنے ہیں۔
ملاقاتوں میں پاکستان اور امریکہ کے درمیان مختلف شعبوں میں تعاون بڑھانے پر بات چیت ہوئی اور اوورسیز پاکستانیوں کے مسائل کے حل کیلئے اقدامات پر بھی گفتگو کی گئی۔
امریکہ میں پاکستان کے سفیر رضوان سعید شیخ بھی اس موقع پر موجود تھے۔
