واشنگٹن ،24جنوری(اے پی پی):وفاقی وزیرداخلہ محسن نقوی کے دورہ امریکا کے دوران واشنگٹن میں اراکین کانگریس کی جانب سے ان کے اعزاز میں عشائیے کا اہتمام کیا گیا۔ عشائیہ کانگریس مین ہنری کیولر اور کانگریس کی فنانشل سروسز کمیٹی کی سرکردہ ممبر میکسائن واٹرز کی جانب سے دیا گیا۔ عشائیے میں وزیر داخلہ اور اراکین کانگریس کے درمیان باہمی دلچسپی کے امور اور پاک امریکا دوطرفہ تعلقات بارے تبادلہ خیال کیا گیا۔ اس موقع پر پاکستان کی معیشت اور آئی ایم ایف کے پروگرام کے حوالے سے بھی تفصیلی بات چیت کی گئی۔ ملاقات میں پاک امریکا تعلقات کے فروغ کےلئے باہمی روابط بڑھانے کی ضرورت پر زور دیا گیا۔ وزیرداخلہ نے اراکین کانگریس کو پاکستان کے دورے کی دعوت دی۔ محسن نقوی نے کہا کہ پاکستانی کمیونٹی امریکا کے مختلف شعبوں میں نمایاں کردار ادا کررہی ہے، اوورسیز پاکستانیوں کی امریکی معیشت کے ساتھ پاکستان کی اقتصادی صورتحال کی بہتری کےلئے خدمات بھی لائق تحسین ہیں۔ پاکستانی نژاد معروف امریکی بزنس مین طاہر جاوید اور امریکا میں پاکستان کے سفیر رضوان سعید شیخ بھی اس موقع پر موجود تھے۔
