اسلام آباد، 21 جنوری (اے پی پی):وفاقی وزیر صنعت و پیداوار رانا تنویر حسین کی زیر صدارت شوگر ایڈوائزری بورڈ کا اجلاس منعقد ہوا، جس میں گنے کی فصل کے تخمینے اور 2024-25 میں چینی کی پیداوار پر تفصیلی جائزہ لیا گیا۔ اجلاس کے اعلامیے کے مطابق چینی کی پیداوار اور ملکی ضرورت کا بھی تفصیلی جائزہ پیش کیا گیا۔
اعلامیہ میں بتایا گیا کہ دسمبر 2024 کے مقابلے جنوری 2025 میں چینی کی پیداوار میں اضافہ ہوا ہے۔ وفاقی وزیر نے شوگر ملرز پر زور دیا کہ وہ چینی کی پیداوار کو بہتر بنانے کے لیے تحقیق میں سرمایہ کاری کریں تاکہ اس صنعت کی کارکردگی مزید بہتر ہو سکے۔
رانا تنویر حسین نے اس بات پر بھی زور دیا کہ شوگر ملرز کسانوں کو گنے کی اچھی قیمت ادا کریں تاکہ وہ زیادہ رقبے پر گنا کاشت کرنے کی ترغیب پائیں۔
وفاقی وزیر نے اس عزم کا اظہار کیا کہ صوبائی حکومتوں کے ساتھ مل کر چینی کی ذخیرہ اندوزی کو ختم کرنے کے لیے بھرپور اقدامات کیے جائیں گے۔
اجلاس کے اختتام پر انہوں نے کہا کہ تمام گھریلو اشیائے ضروریہ کی قیمتیں کنٹرول میں ہیں اور انہیں برقرار رکھنے کے لیے حکومت ہر ممکن اقدام اٹھائے گی۔
