باکو(آذربائیجان)،22فروری(اے پی پی):وفاقی وزیر مواصلات نجکاری و سرمایہ کاری بورڈ عبدالعلیم خان کا مراکش کے بعد آذربائیجان کا دورہ، سی ای او “سٹیٹ آئل فنڈ ” اسرافیل مامادوف اور وفاقی وزیر عبدالعلیم خان کے درمیان ملاقات ہوئی،جس دوران “سوفاز” اور پاکستانی حکومت کے مابین آئل اینڈ گیس میں سرمایہ کاری اور دیگر امور میں تعاون پر گفتگو کی گئی۔
اس موقع پر وفاقی وزیر مواصلات نجکاری و سرمایہ کاری بورڈ عبدالعلیم خان نے کہا کہ آذربائیجان پاکستانی عوام کے دل کے قریب، انتہائی دوستانہ تعلقات کے حامل ہیں۔انہوں نے کہا کہ پاکستان میں آذربائیجان کے سرمایہ کاروں کے لئے نمائشی مراکز کے قیام کے متمنی ہیں۔
وفاقی وزیر نے کہا کہ پاکستان چیمبر آف کامرس کا قیام خوش آئندو درست اقدام ہے،دونوں ممالک بی ٹو بی کی سطح پر سرگرمیوں کو فروغ دے کر سرمایہ کاری بڑھا سکتے ہیں۔
“سوفاز” کے سی ای او اسرافیل مامادوف اور پاکستانی وفد کے ہمراہ اہم اجلاس بھی منعقد ہوا، جس دوران اسرافیل مامادوف نے کہا کہ آذربائیجان کی سٹیٹ آئل کمپنی پاکستان میں سرمایہ کاری میں گہری دلچسپی رکھتی ہے۔ عبدالعلیم خان نے کہا کہ سفیر آذربائیجان خضر فرہادوف کا دونوں ممالک کو نزدیک لانے میں اہم کردار ہے، دونوں ممالک کے مابین سرمایہ کاری اور شراکت داری نئے مراحل میں داخل ہو رہی ہے۔
وفاقی وزیرنے تجویز دی کہ پاکستان میں مواصلات کے شعبے میں بھی آذربائیجان اہم کردار ادا کر سکتا ہے۔انہوں نے کہا کہ ہم وسط ایشائی ریاستوں تک زمینی راستوں سے منسلک ہونا چاہتے ہیں:م۔
اجلاس میں ایس آئی ایف سی کے چیئرمین، وفاقی سیکرٹری صاحبان اور چیئرمین این ایچ اے بھی شریک تھے۔
دورہ کے دوران وفاقی وزیر مواصلات نجکاری و سرمایہ کاری بورڈ عبدالعلیم خان نے آذربائیجان سٹیٹ آئل کمپنی “سوکار”کے پریذیڈنٹ روشان نجف سے بھی ملاقات کی۔
